Jańaózendegi oqýshylar saraıy kúrdeli jóndeýden keıin qaıta ashyldy
Oqýshylar shyǵarmashylyq úıi 40 jyl buryn qoldanysqa berilgen. Bul – sodan beri alǵash ret júrgizilip otyrǵan kúrdeli jóndeý. Joba quny – 1,5 mlrd teńge. Jóndeý jumystary ótken jylǵy mamyrda bastalǵan.
«Zamanaýı tehnıkamen, tehnologııamen jabdyqtalǵan. Infraqurylym jańalanyp, qazirgi zamanǵa laıyq kúrdeli jóndeýden ótti. 1 900 oqýshy ártúrli baǵytta, ártúrli úıirmelerde dáris alady. Olardy 90 qosymsha bilim berý pedagogi óner men bilimge baýlıdy. Aýyldarda ornalasqan 10 aýla klýbymyz bar. Olarda 57 pedagog dáris oqıdy», - dedi Jańaózen qalalyq Oqýshylar shyǵarmashylyq úıiniń dırektory Jumabıke Jamanova.
Atap aıtsaq, aýdıtorııalarǵa ınteraktıv taqtalar, kompıýterler jáne jańa jıhaz alynǵan. Sondaı-aq, kontsert zaly zamanaýı quraldarmen jabdyqtaldy. Shahmat, soworking jáne robot tehnıkasy bólmelerindegi qural-jabdyqtar da jańartylǵan.
«Jel energııasy, kún energııasy, sý energııasy – barlyǵy maketter túrinde kórsetilgen. Onyń jumys algorıtmin birinshi «Lego» lıgasynda kórsetemiz. Biz qurastyryp jatqan robottar úlken naryqqa shyǵýy múmkin. Erteń bir fabrıkalarda, mekemelerde qoldanylyp qalýy múmkin», - deıdi robot tehnıkasy úıirmesiniń qatysýshysy Qanat Jaıylǵanov.
Ortalyqta úıirmeler sanyn kóbeıtý, kadr sanyn arttyrý josparlanyp otyr. Máselen, sadaq atý, teri ıleý sııaqty ulttyq sport pen qolóner túrleri jáne kásipkerlikke baýlý mamandary tartylmaq. Al, ınklıýzıv synyptary logoped, defektolog mamandarymen qamtylǵan.
«Osy jerde ártúrli úıirmelerdiń ashylǵany bizdi qýantyp otyr. Balamnyń tutyqpasy bar edi. Logoped úshin Astanaǵa, Aqtaýǵa aparatyn edim. Endi osy jerde emdetýge múmkindik bar», - deıdi Jańaózen qalasynyń turǵyny Ferýza Temirshıeva.
Ǵımarat ishindegi sport zalmen qatar, workout alańy da ashyldy. Al, mýzykalyq stýdııa men mobılograf kabıneti – jóndeýden keıingi tosyn syılardyń biri bolyp otyr. «Jas aspaz» úıirmesine arnalǵan bólmege as úı jıhazynyń qoıylýy da oqýshylar úshin keremet tartý boldy.
Ǵımarattyń jylý, sý, káriz jáne toq júıesi de jańartylyp, beınebaqylaý kameralary men salqyndatqysh qurylǵylary ornatyldy. Nysan Wi-Fi jelisimen tolyq qamtylǵan. Sondaı-aq, oqýshylar úıiniń aınalasy da abattandyryldy. Atap aıtqanda, tal otyrǵyzylyp, asfalt pen qyrlanǵan kespe tas tóseldi. Aınalasy qorshalyp, jaryqtandyryldy.
