Jańaózendegi oqıǵaǵa syrtqy kúshterdiń qatystylyǵy tekseriledi - Bas prokýratýra
ASTANA. 20 jeltoqsan. QazAqparat /Rýslan Ǵabbasov/ - Jańaózendegi oqıǵaǵa syrtqy kúshterdiń qatystylyǵy tekseriledi.
Bul týraly búgin Astanada ótken brıfıngte Bas prokýratýranyń resmı ókili Nurdáýlet Súıindikov málim etti.
«Jańaózendegi jappaı tártipsizdik syrtqy kúshterdiń qatysymen aldyn ala uıymdastyrylǵan shara degen sózder aıtylýda. Sońǵy kezdesýlerde de aıtqan edim, biz onyń barlyǵyn búginde joqqa shyǵarmaımyz. Syrtqy kúshterdiń buǵan qatysy da tergeý barysynda tekseriletin bolady. Eger de ol qýattalyp jatsa, biz habarlaımyz»,-dep atap ótti resmı ókil.
N.Súıindikov óz sózinde Jańaózendegi jappaı tártipsizdik barysynda 14 adamnyń qaza bolǵanyn naqtylady. Olardyń jeke bastaryn anyqtaý jónindegi jumystar aıaqtaldy.
Budan buryn habarlanǵandaı, búgin Úkimet otyrysynda Aqtaýdan tikeleı beıne baılanysqa shyqqan QR Premer-Mınıstriniń birinshi orynbasary Ómirzaq Shókeev Jańaózendegi tártipsizdikter barysyndaǵy shyǵyn 1, 9 mıllıard teńgeni quraıtynyn jetkizdi.
Tártipsizdikter barysynda 41 nysannyń, onyń ishinde ákimdikterdiń 5 ǵımaraty zardap shekti. «Bizdiń aldyn-ala esepteýimiz boıynsha, olardy qalpyna keltirý úshin shamamen 770 mln. teńge qajet», dedi Ó.Shókeev.
«Qazmunaıgaz BÓ» AQ-nyń 3 ǵımaraty búlingen. Qalpyna keltirý úshin 1 mlrd teńgeden astam qarjyny qajet etedi. Al 29 kommertsııalyq nysan men bank ǵımarattaryn jóndeýge 250 mln teńge, 2 turǵyn úıge 3 mln teńgeden astam qarjy qajet. «Tolyqtaı alǵanda, bizdiń aldyn-ala esepteýimizge sáıkes, atalǵan nysandardyń shyǵyn kólemi 1, 9 mlrd teńgeni quraıdy», dedi ol.
