Jańaózendegi oqıǵa barshamyz úshin úlken sabaq -Úkimet basshysy
ASTANA. 20 jeltoqsan. QazAqparat /Rýslan Ǵabbasov/ - Jańaózendegi oqıǵa barshamyz úshin úlken sabaq, dedi búgin Úkimet otyrysynda Premer-Mınıstr Kárim Másimov.
«Atap aıtqanda, Jańaózendegi tártipsizdik saldaryn joıý boıynsha barlyq sheshimder belgilengen merzimde atqarylýy tıis. Quqyq qorǵaý turǵysynda turaqtylyqty qamtamasyz etý kerek",- dep qadap aıtty Premer-Mınıstr. K.Másimov óz sózinde atalǵan qalada bolǵan oqıǵanyń túpki sebebi baıypty tekserýdi qajet etetinin jetkizdi. Úkimet basshysy osy turǵydaǵy tıisti jumystardy ózi atqaratynyn jáne Elbasynyń qaraýyna usynylatynyn aıtyp ótti. «Bul sharalar bolashaqta osyndaı oqıǵalar Jańaózende, nemese ózge de óńirlerde qaıtalanbas úshin iske asyrylady», dedi Úkimet basshysy. Premer-Mınıstr Qazaqstandaǵy turaqtylyqty nyǵaıtý kerektigine toqtala kele, «bul barshamyz úshin úlken sabaq, osydan tıisti qorytyndy shyǵarý qajet», dep túıindedi.
