Jańaózendegi mektep 16 myń teńgeniń shkafyn 35 myń teńgege satyp almaq bolǵan

NUR-SULTAN. QazAqparat - Jańaózen qalasynyń bilim bólimine qarasty mektepterdiń biri bastaýysh synyptarǵa arnalǵan metall shkaftardy 6,3 mln teńgege satyp almaq bolǵan, dep habarlaıdy QazAqparat.

Bilim mekemesi bir dana shkaftyń qunyn 35 myń teńgeden belgilegen. Al onyń naryqtaǵy ortasha baǵasy – 16 myń teńge. Sybaılas jemqorlyqqa qarsy qyzmettiń Mańǵystaý oblysy boıynsha departamenti satyp alýshymen birlese jumys júrgizip, osy satyp alýdan 3,5 mln teńge únemdedi.

«Aımaqtaǵy Antıkor satyp alynatyn taýarlar men qyzmet túrleri qunynyń naryq baǵasynan joǵary bolmaýyn baqylaýda. Nátıjesinde jyl basynan beri óńirde 660 mln teńge kólemindegi memleket qarjysy únemdeldi. Memlekettik organdar men mekemelerdiń, kvazımemlekettik sýbektilerdiń satyp alatyn taýar nemese qyzmetteriniń baǵalaryna monıtorıng memlekettik satyp alýdyń josparlaý satysynda jáne naryqtyq kórsetkishtermen salystyrý arqyly júrgiziledi», - dep jazdy vedomstvodan.