Jańaózendegi gaz óńdeıtin zaýyttyń qurylysy kúzge deıin bastalady

ASTANA. QazAqparat – Premer-Mınıstr Álıhan Smaıylov «Amanat» atynan saılanǵan máslıhat depýtattarynyń respýblıkalyq forýmynda eldegi gaz máselesin sheshýge baǵyttalǵan negizgi jobalarǵa toqtaldy, dep habarlaıdy QazAqparat tilshisi.

«2025 jylǵa deıin normatıvtik jaǵdaıdaǵy jergilikti joldardyń kólemi 95%-ke deıin jetkiziledi. Gaz máselesin sheshý úshin orta merzimdi perspektıvada kelesi jobalar josparlanǵan. Qashaǵan ken ornynda jalpy qýaty 1 mlrd tekshe metrden asatyn gaz óńdeý zaýytynyń qurylysy júrip jatyr. Sondaı-aq, Qashaǵanda qýattylyǵy 4 mlrd tekshe metr bolatyn taǵy 1 gaz óńdeý zaýytynyń qurylysy pysyqtalý ústinde. Qarashyǵanaq ken ornynda qýattylyǵy 4 mlrd tekshe metr bolatyn gaz óńdeý zaýytyn salý jóninde sheshim qabyldandy», - dedi Úkimet basshysy.

Premer-Mınıstr óńirlerde 640 mlrd tekshe metr gaz qoryn barlaý josparlanyp otyrǵanyn aıtty.

«Jańaózen qalasynda qýattylyǵy 900 mln tekshe metr bolatyn jańa gaz óńdeý zaýytynyń qurylysy kúzge deıin bastalady. Sondaı-aq, oblystarda gazdyń jalpy baǵalaý resýrstary 640 mlrd tekshe metr bolatyn qosymsha barlaý jumystary júrgiziledi», - dedi ol.