Jańaózendegi apat: Jasóspirim Aqtaýǵa sanavıatsııamen jetkizildi
AQTAÝ. QazAqparat - Jańaózen ortalyq qalalyq aýrýhanasynda aýyr halde jatqan 18 jastaǵy jasóspirim sanavıatsııamen Mańǵystaý oblystyq aýrýhanasyna jetkizildi.
Bul týraly «QazAqparat» HAA tilshisine Mańǵystaý oblystyq densaýlyq saqtaý basqarmasynyń medıtsınalyq járdemdi úılestirý bóliminiń basshysy Altyngúl Kóptileýova aıtty.
«Jas jigittiń mıy shaıqalǵan, mańdaı-samaı súıegi synǵan, bas pen mıdyń jabyq jaraqatyn alǵan. Dárigerler naýqastyń bas súıegine trepanatsııa jasady. Traheostomııa (keńirdekke salynǵan) tútiginen tynys alyp jatyr», - deıdi A. Kóptileýova.
Onyń aıtýynsha, jol apatynan zardap shekken úsh birdeı naýqas Aqtaýdaǵy medıtsına mekemesine jyldam jetkizilgen.
«Áıel men alty jasar balany aýrýhanadan shyǵardyq. Olar dárigerlerdiń turaqty baqylaýynda. Eki aıaǵyna ota jasalǵan on jasar qyz jansaqtaý bóliminde, qazirgi jaǵdaıy ornyqty», - dedi ol.
Jol apatynan zardap shekkenderden Jańaózen ortalyq qalalyq aýrýhanasynyń jansaqtaý bóliminde taǵy eki adam, travmatologııa jáne hırýrgııa bólimderinde jeti adam jatyr.
Eske sala ketsek, 25 qarashada «GAZel» men teplovoz soqtyǵysqan jan túrshigerlik jol apaty bolǵan. 9 adam qaza taýyp, 27 jolaýshy aýrýhanaǵa jetkizilgen edi.
