Jańaózendegi áleýmettik máseleni basbuzarlyq jasaýdy kózdegen jeke top saıasılandyryp, qoǵamdyq tártipsizdikti buzý áreketine ákep soqtyrdy - Qaırat Mámı
ASTANA. 21 jeltoqsan. QazAqparat / Qanat Mámetqazyuly/ - Jańaózendegi áleýmettik máseleni basbuzarlyq jasaýdy kózdegen jeke top saıasılandyryp, qoǵamdyq tártipsizdikti buzý áreketine ákep soqtyrdy.
Búgin QR Parlamenti Senatynyń jalpy otyrysynda Senat tóraǵasy Qaırat Mámı osylaı málimdedi. «Jańaózen qalasynda oryn alǵan oqıǵanyń negizinde sot arqyly, sondaı-aq jergilikti atqarýshy organdar men jáne jumys berýshilermen rettelýge tıisti qatardaǵy eńbek daýy jatyr. Biraq osy áleýmettik máseleni basbuzarlyq jasaýdy kózdegen jeke top saıasılandyryp, qoǵamdyq tártipsizdikti buzý áreketine ákep soqtyrdy. Meniń oıymsha, sol top ózderi tasada turyp, áli býyndary qatpaǵan, aqyl-oı sanalary áli qatpaǵan jastardy qylmystyq áreketterge ıtermeledi. Ókinishke qaraı, sonyń saldarynan birneshe adam qaza tapty», - dedi Qaırat Mámı. Sonymen qatar spıker Jańaózende bolǵan oqıǵany uıymdastyrýshylar men naqty tártip buzýshylar qatań jaýapkershilikke tartylyp, tıisti jazasyn alatynyn atap ótti. Sondaı-aq Senat tóraǵasy jańaózendikterdi, aqtaýlyqtardy jáne búkil mańǵystaýlyqtardy sabyrlylyq saqtaýǵa shaqyrdy. «Otanymyzdyń turaqty damýynyń kepili - eldiń birligi men qoǵamdaǵy turaqtylyq». Muny únemi este saqtaýymyz kerek»,- dedi Senat tóraǵasy.
