Jańaózendegi jaǵdaı: QazMunaıGaz taǵy da málimdeme jasady

ASTANA. KAZINFORM — «QazMunaıGaz» kompanııasy Jańaózendegi sońǵy kezdegi oqıǵaǵa baılanysty málimdeme taratty.

— 2024 jyly 12 qarashada «Ózenmunaıgaz» AQ-ǵa qarasty (ÓMG) Burǵylaý jumystary basqarmasy (BJB) qyzmetkerleriniń kásipodaǵy ruqsatsyz aktsııa uıymdastyryp, birqatar talap qoıǵany belgili. Ózenmunaıgaz basshylyǵy BJB jumysshylarymen turaqty túrde kelissóz júrgizip keledi, — delingen kompanııa habarlamasynda.

Kompanııanyń baspasóz qyzmeti 2024 jyly 3 jeltoqsanda «QazMunaıGaz» UK AQ Basqarma tóraǵasynyń orynbasary Bekzat Abaıyldanov Burǵylaý jumystary basqarmasy qyzmetkerlerimen kezdesip, olardy jumysqa shyǵýǵa shaqyrǵanyn jetkizdi. Kelissóz qorytyndysy boıynsha hattama jasalǵan. Hattama ruqsatsyz aktsııaǵa shyqqan jumysshylardyń nazaryna jetkizildi. Alaıda, ÓMG BJB kásipodaq tóraǵasy oǵan qol qoıýdan bas tartqan.

Ulttyq kompanııanyń málimetterine qaraǵanda, ÓMG men úsh kásipodaq arasyndaǵy ujymdyq shart 2024 jyly 25 sáýirde jasaldy. Ujymdyq shartqa sáıkes ÓMG qyzmetkerlerin áleýmettik qoldaýǵa 44 mlrd teńge qarastyrylǵan, sonyń 5 mlrd teńgesi (11%) kompanııanyń Burǵylaý jumystary basqarmasyna arnalǵan jáne árbir qyzmetkerdi áleýmettik qoldaýǵa jyl saıyn 3,8 mln teńge bólinedi.

Buǵan deıin de «QazMunaıGaz» «Ózenmunaıgaz» kompanııasynda qalyptasqan jaǵdaıdy túsindirdi.

«Qazmunaıgaz» kompanııasynyń basqarma tóraǵasy Ashat Hasenov «Ózenmunaıgaz» kompanııasyna qarasty Burǵylaý basqarmasynyń ereýilge shyqqan jumysshylary qashan tolyq jumysqa oralatynyn aıtty.

Keıin bul oqıǵaǵa Qanat Bozymbaev  pikir bildirdi.