Jańaózendegi ken ornynda sý qubyry jaryldy
AQTAÝ. KAZINFORM — «Ózenmunaıgaz» AQ № 4 munaı-gaz óndirý basqarmasynyń aýmaǵynda 1020/10 dıametrli tehnıkalyq teńiz sýynyń qubyry jaryldy.
Osyǵan qatysty Mańǵystaý oblysy boıynsha ekologııa departamenti taldamaly-zertteý bóliminiń qyzmetkerleri jedel anyqtaý jumystaryn júrgizýdi bastaǵanyn málimdedi.
«Ózenmunaıgaz» AQ-nyń № 4 MGÓB aýmaǵyndaǵy MDjÓQKB qarasty 1020/10 dıametrli tehnıkalyq teńiz sýynyń qubyrynyń jaryldy. Departament mamandary 14 sáýir kúni saǵat 17:00 shamasynda Jańaózen qalasyna tekserý jumystaryn júrgizý úshin attandy. Keltirilgen zalaldy anyqtaý úshin oryn alǵan jerdiń lastanýyn qadaǵalaý úshin zerthanalyq-taldamaly baqylaý bóliminiń mamandary oqıǵa oryn alǵan jerdegi topyraqtan synama aldy», — dedi oblystyq ekologııa departamentiniń mamandary.
Atalǵan oqıǵaǵa qatysty «Ózenmunaıgaz» AQ qubyrdyń jarylýyna qatysty kináli tarap anyqtalǵanyn jetkizdi.
«Qazirgi ýaqytta qubyr aqaýyn joıý jumystary júrgizilip jatyr. Jarylǵan qubyr boıynan tot aralasqan qara sý aǵyp, keıin taza sýǵa ulasty. Qubyr jelisinen shyqqan qara sýdyń quramynda ekologııa men adam densaýlyǵyna zııan keltiretin elementterdiń joq ekenin eskertemiz», — dedi kompanııanyń baspasóz qyzmeti.
