Jańaózendegi gaz óńdeý zaýytyna ekologııalyq talaptardy buzǵany úshin aıyppul salyndy

Mańǵystaý oblystyq ekologııa departamenti kásiporynda josparly tekserý júrgizip, ekologııalyq zańnama talaptarynyń birqatar buzylǵanyn anyqtady.

Atap aıtqanda, óndiristik qaldyqtardy basqarý jáne óndiristik materıaldardy saqtaý talaptary saqtalmaǵan. Kásiporynda qaýipti qaldyqtardy bólek jınaý talaptary buzylǵan.

Ekologııalyq kodekske sáıkes, bólek jınalǵan qoqysty keıingi óńdeý kezinde qaıta aralastyrýǵa bolmaıdy.

Sonymen qatar qaýipti óndiristik qaldyqtardyń esebi tıisti deńgeıde júrgizilmegen.

Zańnamada mundaı qaldyqtardyń kólemi, túri, shyǵý tegi, jóneltiletin orny, jınaý merzimdiligi, tasymaldaý tásili jáne olardy óńdeý ádisi hronologııalyq tártippen esepke alynýy tıis.

- Tekserý barysynda óndiristik materıaldardyń da talapqa saı saqtalmaǵany anyqtaldy. Olar tikeleı jerge ornalastyrylǵan. Jer ýchaskelerin paıdalanatyn jeke jáne zańdy tulǵalar topyraqty lastaýǵa, aýmaqty qoqystaýǵa, jerdiń tozýyna jáne qunarsyzdanýyna jol bermeýge mindetti. Anyqtalǵan zań buzýshylyqtardy joıý úshin kásiporynǵa tıisti uıymdastyrýshylyq jáne tehnıkalyq sharalardy qabyldaý týraly nusqama berildi, - delingen habarlamada. 

Budan bólek, anyqtalǵan buzýshylyqtar boıynsha kásiporynǵa qatysty Ákimshilik quqyq buzýshylyq týraly kodekstiń úsh baby boıynsha hattamalar toltyrylǵan.

Buǵan deıin, Mańǵystaý oblysynda aýrýhanaǵa bólingen 223 mln teńgeni jymqyrý isi boıynsha 3 adam qamalǵan bolatyn.