Jańaózendegi dáriger ólimi: ІІM tergeýge qatysty túsinik berdi

ASTANA. KAZINFORM – QR Іshki ister mınıstriniń orynbasary Igor Lepeha Jańaózende dárigerdiń ólimine qatysty is boıynsha pikir aıtty.

Aıta keteıik, jyl basynda Memleket basshysy medıtsına qyzmetkerlerin quqyqtyq qorǵaýdy kúsheıtý týraly zańǵa qol qoıdy. Endi olardyń quqyǵy zańmen qorǵalady.

Qujatta Qylmystyq kodekske medıtsına qyzmetkerleriniń, sondaı-aq jedel medıtsınalyq járdem brıgadalarynyń júrgizýshileriniń qyzmettik mindetterin atqarý kezinde olardyń ómirine, densaýlyǵyna jáne qaýipsizdigine qaýip tóndirgeni úshin qylmystyq jaýaptylyqty belgileıtin jańa baptar eskerilgen.

Osy oraıda búgin Senattaǵy baspasóz máslıhatynda tilshiler: «Jańaózende pyshaq jaraqatynan mert bolǵan dárigerdiń isi boıynsha tergeý amaldary jańa zańnyń normalary boıynsha júrgizile me?» dep surady.

- Ony tergeýshi anyqtaıdy. Olar istiń mán-jaıyn eskeredi. Biraq bul derek kisi óltirý isi boıynsha qozǵaldy jáne bul jaǵdaı óte aýyr saldarǵa ákep soqty. Al zańdaǵy jańa normalar qorqytý nemese basqa da qaýipti áreketterge qatysty boldy. Jańaózendegi oqıǵa kisi óltirý faktisine baılanysty bolyp tur. Sondyqtan osy jaǵdaıda onsyz da qatań norma boıynsha is qozǵalǵan, - dedi I. Lepeha.

Budan buryn habarlanǵandaı, Mańǵystaý oblysy Jańaózen qalasynda búgin 28 qańtarda saǵat shamamen 14:00-de medıtsınalyq mekemeniń dálizinde terapevt dárigerge er adam shabýyl jasap, aýyr pyshaq jaraqatyn salǵan. Sonyń saldarynan 29 jastaǵy jas maman qaza tapty.