Jańaózende jol apatynan bes adam qaza tapty
AQTAÝ. QazAqparat - Mańǵystaý oblystyq ІІD baspasóz qyzmeti Jańaózende túnde bolǵan jol apatynyń mán-jaıyn aıtty, dep habarlaıdy QazAqparat lada.kz-ke silteme jasap.
Vedomstvoda habarlaǵandaı, Lexus jáne BMW avtomobılderiniń soqtyǵysýy «Samal» shaǵynaýdany aýmaǵyndaǵy tasjolda keshe saǵat 04.30-da bolǵan.
«Apat saldarynan 5 adam qaza tapty. Atalmysh fakti boıynsha QR QK 345-baby 4-bóligi boıynsha sotqa deıingi tergeý jumystary bastaldy. Qajetti saraptamalar taǵaıyndaldy», - dep habarlady Mańǵystaý oblystyq ІІD baspasóz qyzmeti.
Jýrnalıster jol apatynda qaza tapqan bir jolaýshynyń týystarymen baılanysty.
«Ár kólikte úsh adamnan otyrǵan. Lexus kóliginiń júrgizýshisi baǵdarshamnyń qyzyl túsinen ótip ketpekshi bolǵan. BMW júrgizýshisi aýyr halde aýrýhanaǵa jetkizildi», - dedi qaza tapqan 22 jastaǵy boıjetkenniń týysy.
Jańaózen aýrýhanasynan habarlaǵandaı, zardap shekkenderdiń biri jansaqtaý bóliminde. Onyń jaǵdaıy turaqty aýyr. Er adamnyń qaı kólikte bolǵany belgisiz.
