Jańaózende jol apatynan 9 adam zardap shekti

AQTAÝ. QazAqparat – Jol apatynan zardap shekkender arasynda 4 áıel adam men eki jasar bala bar. Bul týraly MO Densaýlyq saqtaý basqarmasynyń baspasóz qyzmeti málimdedi, dep habarlaıdy QazAqparat tilshisi.

Jol apaty 9 qazan kúni keshki saǵat 22:15-te bolǵan. №22 shaǵynaýdandaǵy mektep janynda birneshe jeńil kólik soqtyǵysqan.

Saldarynan 9 adam zardap shegip, olar Jańaózen qalalyq aýrýhanasyna jetkizilgen.

«Zardap shekkender arasynda eki jasar bala boldy, ol travmatologııa bólimine jabyq mı jaraqatymen jetkizildi. Mıy shaıqalǵan. Sonymen qatar, osy bólimge 55 jastaǵy áıel adam oń jaq aıaǵynyń súıegi synyp jatqyzyldy. Budan bólek, 4 áıeldiń de mıy shaıqalǵan. Al, 22 jastaǵy er adam men 51 jastaǵy áıelge alǵashqy kómek kórsetilip, ambýlatorııalyq emge jiberildi. Al, bir adam em alýdan bas tartyp, úıine ketti» delingen habarlamada.