Jańaózende jeti balanyń anasy qaza tapty: kúdikti – kúıeýi

AQTAÝ. KAZINFORM — Quqyq qorǵaý organdarynyń málimetinshe, qylmys jasady degen kúdikpen marqumnyń kúıeýi qamaýǵa alynǵan.

Qaıǵyly oqıǵa 29 qańtar kúni Jańaózen qalasynda bolǵan.

- Pyshaq jaraqatynan 44 jastaǵy áıel kóz jumdy. Marqumnyń jeti balasy bar. Onyń beseýi kámeletke tolmaǵan. Kúdikti retinde jubaıy ustalyp, ýaqytsha ustaý ızolıatoryna qamaldy. Aldyn ala anyqtalǵandaı, erli-zaıyptylar arasynda turmystyq janjal týyndap, ol qaıǵyly jaǵdaımen aıaqtalǵan, - deıdi Jańaózen qalasy Polıtsııa basqarmasy bastyǵynyń orynbasary Maqsat Saǵynov.

Atalǵan derek boıynsha Qazaqstan Respýblıkasy Qylmystyq kodeksiniń 99-babynyń 2-bóligi (Adam óltirý) boıynsha qylmystyq is qozǵalǵan. Qazirgi ýaqytta bolǵan oqıǵanyń barlyq mán-jaıyn jan-jaqty, tolyq jáne obektıvti anyqtaýǵa baǵyttalǵan tergeý amaldary júrgizilip jatyr.

Buǵan deıin, Jańaózende jumys ornynda jas dárigerdiń pyshaq jaraqatynan mert bolǵany týraly jazǵan bolatynbyz.