Jańaózende jarylystan zardap shekken naýqastardyń qazirgi jaǵdaıy qalaı

JAŃAÓZEN. QazAqparat – Qazir Jańaózen qalalyq kópbeıindi aýrýhanasynda jarylystan zardap shekken 5 adam jatyr. Dárigerler naýqastardyń jaǵdaıyn aıtty, dep habarlaıdy QazAqparat tilshisi.

«Bizde qazir 5 naýqas jatyr. 6 naýqas túsken edi. Bireýi kúıikpen oblystyq aýrýhanaǵa aýystyryldy. Jansaqtaý bóliminde 1 kelinshek pen er adam jatyr. Ekeýiniń de jaǵdaıy aýyr. Áıel sál esin jıyp keledi. Travmotologııa bólimshesinde 2 qyz ben er adam bar. Olardyń jaǵdaıy ortasha», - dedi Jańaózen qalalyq kópbeıindi aýrýhanasynyń basshysy Serik Asqarov.

Aıta ketsek, 17 sáýirde Jańaózen qalasynyń 2-móltekaýdanyndaǵy qosqabatty úıde jarylys bolyp, 13 adam zardap shekken edi.

Zardap shekkenderdiń biri jedel járdemmen Mańǵystaý oblystyq kópsalaly aýrýhanasyna jetkizilgen bolatyn.

Oqıǵaǵa oraı qylmystyq is qozǵalyp, barlyǵy 4 adam qaza tapqany belgili boldy.