Jańaózende jańbyrdan keıin úsh mektep pen balabaqshany sý basyp qaldy

JAŃAÓZEN. QazAqparat - Jańaózende aýlalardy, úılerdi, kóshelerdi, sondaı-aq úsh mektep pen balabaqshany sý basqan. Oqýshylar ýaqytsha qashyqtan oqytýǵa kóshirildi, dep habarlaıdy QazAqparat LADA.kz saıtyna silteme jasap.

Qutqarýshylar sý basý jaǵdaılaryn joıý boıynsha jumystardy jalǵastyrýda, jańbyr sýyn sorý júrgizilip jatyr.

«Jańaózen qalasynyń Tótenshe jaǵdaılar bólimi jergilikti atqarýshy organdarmen birlesip, Jańaózen qalasy órt sóndirý bóliminiń arnaıy tehnıkasyn jáne sý sorǵysh qurylǵylardy jumyldyra otyryp, jańbyr sýyn soryp jatyr. Barlyǵy 43 aýlany, tórt kósheni, tórt turǵyn úıdi, úsh mektep pen balabaqshany sý basqan. Oqý protsesi toqtatyldy», - dedi oblystyq TJD-nyń jedel kezekshisi Ibrem Baıramov.

Bilim basqarmasy sý basqan bilim oshaqtaryndaǵy jaǵdaıdy aıtty. «Tolassyz jaýǵan jańbyr saldarynan balabaqsha qyzmetkerleri men tárbıelenýshileri, sondaı-aq mektep oqýshylary oqý oryndaryna kele almady», - dep habarlady vedomstvodan.

Jańaózen qalasy «Raýan» shaǵyn aýdanyndaǵy №22 orta mektep, Rahat aýyly «Mereı» shaǵyn aýdanyndaǵy №9 mektep, Kendirli aýylyndaǵy №21, 23 mektepter men №12 «Rahat» balabaqshasyn sý basqan.