Jańaózende jańa jumys oryndaryn qurý úshin 17 joba jasaqtaldy
Jobalar bıznesti damytý jáne jańa jumys oryndaryn qurý boıynsha 2022-2024 jyldarǵa arnalǵan «Jol kartasy» negizinde ázirlendi. Mańǵystaý oblysy ákimdigi, «Atameken» UKP, «Samuryq-Qazyna» UÁQ» AQ toby kompanııalary ókilderiniń qatysýymen qurylǵan jumys tobynyń otyrysy ótti. Onda bıznes-jobalardy aldyn ala irikteý boıynsha jumystar júrgizildi.
«15 maýsymda Jańaózen qalasynda bıznes-jobalardy aldyn ala irikteý boıynsha jumys tobynyń birinshi otyrysy ótti. Jumys tobynyń reglamentine jobanyń qatysýshylary úshin qujattar tizbesin bekitý, óndiristik bazany jasaqtaý, tehnologııalyq jabdyqty tekserý aktilerin ázirleýge qatysty ózgerister engizý týraly sheshim qabyldandy», - dedi Mańǵystaý oblysy kásipkerler palatasy dırektorynyń orynbasary Aqqý Aıtjanova.
Qazirgi ýaqytta jumys tobynyń otyrysynda Jańaózende jańa turaqty jumys oryndaryn qurýdy qamtamasyz etý boıynsha 17 joba qaraldy.
Jobalardyń bul tizimi «Samuryq-Qazyna» UÁQ AQ-ǵa jiberildi. Uzaqmerzimdi kelisimsharttar jasalyp, jobalar iske asatyn bolsa, qalada 696 jumys orny ashylmaq.
