Jańaózende zańsyz saqtalǵan tórt tonna munaı ónimi anyqtaldy
AQTAÝ. KAZINFORM – Mańǵystaý oblysynyń Jańaózen qalasynda zańsyz munaı ónimderiniń aınalymyna qatysty derek anyqtaldy. Polıtsııa jeke bazanyń aýmaǵynan tórt tonna munaı ónimin tárkiledi.
Mańǵystaý oblystyq polıtsııa departamentiniń málimetinshe, jedel is-shara 21 qazanda saǵat 18:10 shamasynda Raýan shaǵynaýdanyndaǵy ónerkásiptik aımaqta ornalasqan jeke baza aýmaǵynda júrgizilgen. Oǵan uıymdasqan qylmysqa qarsy kúres basqarmasynyń qyzmetkerleri men polıtsııanyń arnaıy bólimshesiniń jaýyngerleri qatysqan.
Tekserý barysynda quqyq qorǵaý organdary tórt tonnalyq ydysqa quıylǵan munaı ónimderin anyqtap, tárkilegen.
Atalǵan derek boıynsha qylmystyq is qozǵaldy.
Kúdiktige qatysty Qazaqstan Respýblıkasy Qylmystyq kodeksiniń 233-1-babynyń 1-bóligi boıynsha tergeý júrgizilip jatyr. Bul bap munaı ónimderiniń zańdy shyǵý tegin rastaıtyn qujattarsyz, edáýir mólsherde tasymaldaý, satyp alý, ótkizý nemese saqtaý áreketterine jaýapkershilik qarastyrady.
Atalǵan quqyq buzýshylyq úshin 160 aılyq eseptik kórsetkishke deıin aıyppul salý, sol mólsherde túzeý nemese qoǵamdyq jumystarǵa tartý, sondaı-aq 40 táýlikke deıin qamaýǵa alý jazasy kózdelgen.
Qazir polıtsııa munaı ónimderiniń qaıdan ákelingenin anyqtap, oqıǵanyń mán-jaıyn tekserip jatyr. Tergeý jalǵasýda.
Buǵan deıin, 17,7 myń tonna qaldyq zańsyz kómilgen: Eco-Mangistau-ǵa aıyppul salyndy.
