Jańaózende úıi órtenip ketken jalǵyzbasty ana jurttan kómek surady
MAŃǴYSTAÝ. QazAqparat - Mańǵystaý oblysy Jańaózen qalasynda túngi ekiler shamasynda oqys oqıǵa boldy. Shyrt uıqyda jatqan otbasynyń úıi órtenip, baspanasyz qaldy. Endi sharasyz qalǵan 4 balanyń anasy kópshilikten kómek suraıdy, dep habarlaıdy QazAqparat.
Qyzyl jalyn kesirinen dúnıe-múlik, kıim-keshektiń saý tamtyǵy qalmaǵan. Abyroı bolǵanda, úı ıeleri din aman.
Úı ıesi Tamara Hodjanazarovatún ortasynda tútinniń ıisinen shoshyp oıanǵan. Aınala tumandanyp, tunshyǵyp bara jatqanyn sezgen ol es jıyp, áreket etýge kirisedi. Birden, balalaryn syrtqa shyǵaryp, kórshilerdi kómekke shaqyrady.
«Esik tarsyldap jatyr eken. Júgirip baryp, esik ashtyq. Tamara 4 balasyn súırep, jalańaıaq kómek surap shyryldaýda. Órt sóndirýshilerge telefon shalyp, bárimiz júgire jóneldik. Degenmen, biraz dúnıesi janyp ketti», - deıdi oqıǵanyń kýágeri, úı ıesiniń kórshisi Kúmis Tájiqulova.
Órt sóndirýshilerdiń aıtýynsha, qyzyl jalynnyń sharpýyna elektr júıeleriniń qysqasha tuıyqtalýy sebep bolǵan.
Osydan 2 jyl buryn azamatynan kóz jazyp qalǵan Tamara kóptiń járdemine zárý. 2 ul 2 qyz tárbıelep otyr. Balalary da kishkentaı. Aılyǵy da kóńil kónshiterlik emes. Sondyqtan baspanasyn qalypqa keltirýge halyqtan kómek suraıdy.
«Qoldan kelgenshe, qarjylaı kómek kórsetseńizder eken deımin. Aǵaıyndarymyz tamaq, ydys-aıaq ákelip járdemdesýde», - deıdi jalǵyzbasty ana.
Qazir Rahat aýyly ákimdigi qoldaýymen baspanadaǵy qaldyqtar shyǵarylyp jatyr. Degenmen, otaǵasy joq otbasy úshin bul kómek azdyq etedi. Sondyqtan jalǵyzbasty ana kóptiń járdemine zárý.
