Jańaózende Ulttyq ulan sarbazdary joǵalǵan eki balany tapty
NUR-SULTAN. QazAqparat - Jańaózende Ulttyq ulan sarbazdary joǵalǵan eki balany tapty, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, oqıǵa 5 mamyr kúni keshkisin saǵat 19.20 shamasynda boldy.
Jańaózen qalasy polıtsııa bóliminiń jedel basqarý ortalyǵyna áıel habarlasyp, óz úıiniń aýlasynda oınap júrgen uly men qyzynyń joǵalyp ketkendigin jetkizgen.
Balalardy izdeýge barlyq jeke quram jumyldyrylyp, Ulttyq ulan sarbazdary barlyq kóshe men qala mańyn súzip shyqty.
Quramynda leıtenant Ulan Maqsatuly, efreıtorlar Naýryzbek Bólegen men Maqsat Taı bar top 40 mınýttan keıin «Órken» dámhanasy mańynda jylap otyrǵan eki balany jolyqtyrady. Jaýyngerler olardy jubatyp, keıin ata-anasyna tapsyrdy.
Joǵalyp, qaıta tabylǵan alty jasar Altynbek Ulttyq ulan sarbazy bolǵysy keletinin aıtty.
Qyraǵylyq kórsetken áskerı qyzmetkerler 5548-áskerı bólim komandırimen yntalandyryldy.
Eske sala keteıik, budan buryn Aqtaýda Ulttyq ulan sarbazdary izdeýde júrgen kúdiktini qolǵa túsirgenin jazǵan bolatynbyz.
