Jańaózende túlekter kóliktiń terezesinen denesin shyǵaryp kóshe aralady

JAŃAÓZEN. QazAqparat – Áleýmettik jelide jańaózendik mektep túlekteriniń júrip bara jatqan kóliktiń terezesinen denesin shyǵarǵan beınejazbasy tarady. Jasóspirimderdi mingizip, jol qaýipsizdik erejesin óreskel buzǵan kólik júrgizýshileri jaýapkershilikke tartyldy. Bul týraly Mańǵystaý oblystyq polıtsııa departamentiniń baspasóz qyzmetinen málim etti, dep habarlaıdy QazAqparat tilshisi.

Oqıǵa 30 mamyr kúni Jańaózen qalasynyń Aqsý shaǵynaýdanyndaǵy tasjolda bolǵan.

«Daimler Chrysler» markaly avtokóliginiń jolaýshylary qaýipsizdik belbeýin taqpaı, zańbuzýshylyqqa jol berdi.

Jańaózen qalasynyń polıtseıleri kólik júrgizýshisiniń jeke basyn anyqtap, oǵan qatysty Ákimshilik quqyq buzý týraly kodekstiń 593-baby 2-bóligimen hattama toltyrdy.

Al «Mercedes Benz E 320» avtokóliginiń júrgizýshisiniń birden eki quqyq buzýshylyq jasaǵany belgili bolǵan.

«Ol Ákimshilik quqyq buzý týraly kodekstiń 614-babynda kózdelgen erejelerdi elemeı, kólik basqarý kezinde jol qozǵalysynyń ózge qatysýshylaryna qasaqana kedergi keltirgen. Jol saqshylary 21 jastaǵy azamatty osy bap boıynsha jaýapkershilikke tartty. Sonymen qatar artqy oryndyqtaǵy jolaýshynyń qaýipsizdik belbeýin qoldanbaǵany anyqtalyp, ol atalǵan kodekstiń 593-baby 3-bóligimen jazalanatyn boldy» delingen habarlamada.

Artqy oryndyqtaǵy jasóspirimder terezeden denesin shyǵarǵan «BMW 5251» markaly avtokóliktiń júrgizýshisi de zań negizinde jaýapqa tartylǵan.