Jańaózende tapanshamen júrgen mas adam ustaldy
AQTAÝ. QazAqparat - Ulttyq ulan jaýyngerleri Jańaózende tapanshamen júrgen mas adamdy ustady, dep habarlaıdy QazAqparat tilshisi.
Oralda ornalasqan «Batys» óńirlik qolbasshylyǵynyń baspasóz qyzmetinen túsken málimetke qaraǵanda, oqıǵa 14 maýsym kúni keshki saǵat 20.13 shamasynda oryn aldy.
Quramynda qatardaǵy jaýyngerler Eldos Mamataev, Ernaı Bastan jáne Nurjan Keńesbaev bar 5548-áskerı bólimniń kezekshi toby 1-shaǵynaýdandaǵy 29-úı mańynda mas kúıde júrgen jas jigitti baıqaıdy. Ol qatty mas bolyp qana qoımaı, aıqaı-shý shyǵaryp, kóringen adamdy balaǵattap, tıisedi. Ol saqshylardy kórgen boıda orama zatty laqtyryp, qasha jónelgenimen, kóp uzamaı-aq qolǵa tústi. Kýálardyń qatysýymen teksergen kezde oramanyń ishinen pnevmatıkalyq tapansha tabyldy.
Oqıǵa ornyna Jańaózen qalalyq Іshki ister basqarmasynyń jedel tergeý toby shaqyrylyp, olar 22 jasar turǵynnan atalǵan tapanshany tárkiledi.
