Jańaózende shujyqtan tiri qurt shyqty
JAŃAÓZEN. QazAqparat - Jańaózen qalasynyń turǵyny dúkennen satyp alǵan shujyǵynan tiri qurt aldy. Ol ony vıdeoǵa túsirip, áleýmettik jelige taratyp jibergen, dep habarlaıdy QazAqparat tilshisi.
Áleýmettik jelide taraǵan «shujyqtan tiri qurt shyqty» degen vıdeo jurtshylyqtyń jıirkenishin týǵyzǵan bolatyn. Jańaózendik turǵyn balasyna bergen shujyqtyń ishinen uzyndyǵy 2-3 sm bolatyn tiri qurttyń jybyrlap júrgenin ańǵaryp qalǵan.
Ol vıdeoda shujyqtyń «Osobaıa» dep atalatynyn aıtyp, abaı bolýǵa keńes beredi. Tipti, qaptamada «xalal» dep jazylyp turǵanyn aıtyp, tańdanǵan.
Degenmen, din ókilderi: «Halal Damý» JShS QMDB-nyń ruqsatymen mekemeler men kásiporyndarǵa arnaıy saraptama júrgizip, sertıfıkat beredi. Dinı basqarmanyń arnaıy logotıpi turǵanyna kóz jetkizip, soǵan basa nazar aýdarǵan durys» dep otyr.
Al, Jańaózen qalalyq qoǵamdyq densaýlyq saqtaý basqarmasy mamandary «turǵyndardan aryz-shaǵym túspese, qaı saýda núktesi ekenin anyqtaý qıyn» deıdi. Áıtse de, vıdeony áleýmettik jelige júktegen nómir ıesin PB arqyly anyqtap,saýda núktesin bilýge árekettenip jatqandaryn jetkizdi.
