Jańaózende «Ózenmunaıgazdyń» 60 jyldyǵyna arnalǵan saltanatty jıyn ótti
JAŃAÓZEN. KAZINFORM – Jańaózende «Ózenmunaıgaz» AQ (ÓMG) 60 jyldyǵyna jáne Qazaqstan munaı-gaz ónerkásibiniń qalyptasýyna 125 jyl tolýyna oraı saltanatty jıyn ótti. Merekelik is-sharaǵa Mańǵystaý oblysynyń ákimi Nurdáýlet Qılybaı, Senat depýtaty Bekbol Orynbasarov, Májilis depýtaty Edil Jańbyrshın, «QazMunaıGaz» UK AQ Basqarma tóraǵasy Ashat Hasenov, sala ardagerleri, kompanııa qyzmetkerleri jáne basqa da qonaqtar qatysty.
«Ózenmunaıgaz» AQ tarıhy 1964 jyly 15 shildede qurylǵan «Ózen» munaı kásipshiliginen bastaý alady. Sodan beri kásiporyn 60 jyl ishinde 400 mln tonnadan astam munaı óndirip, Qazaqstan munaı salasynyń damýyna úlesin qosyp keledi.
Saltanatty jıyn barysynda Mańǵystaý oblysynyń ákimi Nurdáýlet Qılybaı jınalǵan qaýymdy mereıtoımen quttyqtap, kompanııanyń óńirdiń áleýmettik-ekonomıkalyq damýyndaǵy mańyzdy rólin atap ótti.
«QazMunaıGaz» UK AQ Basqarma tóraǵasy Ashat Hasenov óz sózinde kompanııanyń jetistikterine toqtalyp, kásiporynnyń órkendeýine úles qosqan ardagerler men qyzmetkerlerge alǵysyn bildirdi. Ol sondaı-aq eldiń strategııalyq maqsattary aıasynda kompanııany odan ári damytýdyń mańyzyna nazar aýdardy.
«Ózenmunaıgaz» AQ – Jańaózenniń negizgi qala quraýshy kásiporny. Áleýmettik jaýapty kompanııa retinde ÓMG qala turǵyndarynyń ómir sapasyn jaqsartýǵa baǵyttalǵan bastamalarǵa, sonyń ishinde sport keshenderi men basqa da áleýmettik mańyzy bar nysandardyń qurylysy sııaqty jobalarǵa jan-jaqty qoldaý kórsetip keledi.
Sonymen qatar Toqmaq (Qaraqııa aýdany) jerinde qýaty táýligine 50 myń tekshe metr teńiz sýyn tuşytatyn zaýyt qurylysy júrip jatyr. Budan buryn Qarajanbas ken ornynda ilespe qabat sýyn tuşytý zaýyty tolyq qýatyna shyqqan bolatyn. Bul Astrahan-Mańǵyshlaq magıstraldy qubyry arqyly keletin sýdyń edáýir kólemin bosatýǵa múmkindik berdi. Jalpy, QMG atalǵan bastamalardyń arqasynda Mańǵystaý oblysy turǵyndarynyń qajetine táýligine shamamen 70 myń tekshe metr kólemde aýyz sýyn bosatady.
Odan bólek, qalada 350 orynǵa arnalǵan oqýshylar saraıynyń qurylysy bastaldy, munaı-gaz jabdyqtaryn shyǵaratyn zaýyttyń irgetasy qalanǵan bolatyn.
Іs-shara sońynda sala ardagerlerine qurmet kórsetilip, eńbegi sińgen mamandarǵa marapat tabystaldy. Saltanatty jıyn kontserttik baǵdarlamaǵa ulasty.
