Jańaózende lýdoman óz-ózine qol jumsady

AQTAÝ. KAZINFORM — Jantúrshigerlik oqıǵa keshe saǵat 17:30–da Jańaózen qalasy «Samal» shaǵyn aýdany 28-shi úıde bolǵan.

Áleýmettik jelide taraǵan aqparat boıynsha 33 jastaǵy turǵyn áıelimen bolǵan janjaldan keıin, dálizge shyǵyp, óz-ózine qol jumsap tamaǵyn kesken. Sodan keıin turǵyn úıdiń 4-qabatynan sekirgen. Saldarynan eki aıaǵy synyp, aýyr jaǵdaıda Jańaózen qalalyq kóp beıindi aýrýhanaǵa jetkizildi. Qazir jansaqtaý bóliminde jatyr. 

— Naýqastyń jaǵdaıy aýyr, san súıegi, keýde súıegi synǵan. Qulaǵannan ish qurylysyna zaqym kelgen. Moıny men ıyǵynda qıylǵan jaralar bar. Jaraqattardyń saldarynan naýqas qansyrap qalǵan, — deıdi aýrýhana dırektorynyń emdeý isi jónindegi orynbasary Marat Edilhanov. 

Mańǵystaý oblystyq polıtsııa departamentiniń baspasóz qyzmeti Áıgerim Ibatýllaevanyń málimetinshe, osy oqıǵa boıynsha qylmystyq is qozǵaldy. 

— Oqıǵanyń barlyq mán-jaıyn anyqtaý úshin tergeý amaldary júrgizilýde. Aldyn ala málimet boıynsha jábirlenýshi qumar oıyndarǵa áýestengen. Tergeý jalǵasýda, — deıdi Áıgerim Ibatýllaeva.

Buǵan deıin, sýdıa ajyrasý isteriniń neshe paıyzy lýdomanııadan bolatynyn aıtqan edi.