Jańaózende qylmyskerler áreket etti jáne olardyń qylmysyn áleýmettik qarsylyqqa teńestirýge bolmaıdy - QR Prezıdentiniń keńesshisi Ermuhamet Ertisbaev
Bul týraly búgin Qaýipsizdik Keńesi otyrysynyń qorytyndylary boıynsha brıfıngide BAQ ókilderine QR Prezıdentiniń saıası máseleler jónindegi keńesshisi Ermuhamet Ertisbaev aıtty.
«Ózderińizge belgili, búg3n Qaýipsizdik Keńesiniń otyrysy ótti. Memleket basshysy Jańaózende zardap shekken Qazaqstan azamattaryna jáne qaza tapqandardyń otbasylaryna shynaıy jáne tereń qaıǵyrǵan kóńil aıtty. Qashanda da mundaı tótenshe oqıǵalarda jazyǵy joq adamdar zardap shegedi jáne onyń 16 jeltoqsanda, bizdiń uly kúnimizde, Táýelsizdik kúni bolǵany kóńilge qaıaý túsiredi. Meniń biletinim, Nursultan Ábishuly osy óte aýyr saǵattarda zardap shekkenderdiń barlyq otbasylaryna barynsha materıaldyq kómek kórsetý jóninde nusqaý berdi jáne bul máseleni óziniń tikeleı baqylaýyna aldy», - dedi E.Ertisbaev.
«Memleket basshysy búgin bizdiń barlyǵymyzdy táýelsiz damýymyzdyń 20 jyly ishinde biz qol jetkizgen eń basty qundylyǵymyz - sabyrlylyqty, tynyshtyq pen ornyqty damýymyzdy odan ári kózdiń qarashyǵyndaı saqtaýǵa shaqyrdy. Táýelsizdiktiń 20 jyldyǵy kúni, mine, osy sátte barlyq qazaqstandyqtar Ult kóshbasshysynyń tóńiregine, bizdiń Prezıdentimizdiń tóńiregine toptasýdyń úlken qajettigin taǵy da sezindi, ol bul máseleni óziniń tikeleı baqylaýyna alyp otyr», - dep qosty Memleket basshysynyń keńesshisi.
Ermuhamet Ertisbaevtyń aıtýynsha, ókimet qazirdiń ózinde Jańaózendegi jaǵdaıdy turaqtandyrý jóninde sharalar qabyldady. Máselen, 2012 jylǵy 5 qańtarǵa deıin Memleket basshysynyń Jarlyǵymen qalada tótenshe jaǵdaı engizildi, respýblıka ishki ister mınıstri men bas prokýrorynyń birlesken basshylyǵymen jedel-tergeý toby, sondaı-aq birinshi vıtse-premer Ó.Shókeevtiń basshylyǵymen úkimettik komıssııa quryldy, olar bolǵan oqıǵanyń mán-jaıyn barynsha zerdeleıtin bolady.
«Men tótenshe jaǵdaıdyń engizilýi oryndy dep oılaımyn, óıtkeni otty qarýdy alyp, olardy beıbit azamattarǵa qarsy, quqyq qorǵaý organdarynyń qyzmetkerlerine qarsy qoldaný qajet dep sanaıtyn adamdar bar. Álemniń kez kelgen elinde jáne árqashan da eger osyndaı oqıǵalar bola qalsa, Memleket basshysy óziniń barlyq quzyretin paıdalana otyryp, osyndaı erekshe sharalardy qolǵa alýǵa quqyly», - dep túsindirdi Ertisbaev.
Bolǵan oqıǵany tekserý barynsha egjeı-tegjeıli, shynaıy jáne barynsha ashyq júrgiziletin bolady, dep habarlady Memleket basshysynyń keńesshisi. Onyń ústine, E.Ertisbaevtyń aıtýynsha, Nursultan Nazarbaev búgingi Qaýipsizdik Keńesiniń otyrysynda atap kórsetkendeı, tekserýge táýelsiz sarapshylar da tartylýy múmkin.
"Bul óte mańyzdy másele, óıtkeni bul eshkim de tekserý shynaıy júrgizilmedi dep bizdi aıyptaı almaýy úshin qajet. Qaıta biz tekserý shynaıy bolýyna, bul qylmystyq áreketterdi bastaýshylardyń attary atalyp, tıisti sharalar qabyldanýy úshin óte-móte múddelimiz. Sonymen qatar barynsha shynaıy tekserý bolashaqta mundaı jaǵdaı elimizde qaıtalanbaýy úshin de qajet», - dep atap kórsetti keńesshi.
Sonymen qatar E.Ertisbaev Jańaózende qylmyskerlerdiń áreket etkendigin jáne olardyń jasaǵan qylmystaryn áleýmettik narazylyqpen shatastyrýǵa nemese oǵan teńestirýge de bolmaıtyndyǵyn erekshe basa aıtty.
«Men ázirshe buny tyńǵylyqty josparlanǵan aktsııa dep aıta almaımyn, degenmen ondaı da aqparat bar. Biraq eńbek daýyn, kez-kelgen áleýmettik daý-damaıdy qaraqshylyq elementterden naqty bóle-jara qarastyrý qajet. Taǵy da bir márte sizderdiń nazarlaryńyzdy quqyq qorǵaý organdaryna, beıbit azamattarǵa qarsy qol kóterýge túrtki bolǵan qaraqshylyq elementtermen birneshe aıǵa sozylǵan eńbek daýyn eshqashand a shatastyrmaýdy jáne qatar qoımaýdy qaperlerińizge alýǵa basa kóńil bólýlerińizdi qalaımyn. Aldyn ala málimetterge sáıkes, Jańaózende shamamen 10 adam qaza tapty, aýyr jaralanǵandardyń ishinde quqyq qorǵaý organdarynyń qyzmetkerleri de bar... Adam , taǵy bir adamnyń ómirin qıǵanda shekten shyǵyp, zańdy attap ótedi, qylmyskerge aınalady. Buny barlyǵy aıqyn túsinýi qajet. Jáne de men kópultty qazaqstandyq halyq, Qazaqstannyń barlyq azamattary Jańaózende oryn alǵan keshegi oqıǵalardy aıyptaıtyndyǵyna ári Memleket basshysymen birge zardap shekken otbasylarǵa shyn nıetimen qaıǵylaryna ortaqtasatyndyǵyna kámil senemin», - dep atap ótti keńesshi.
Brıfıng barysynda Ermuhambet Ertisbaev oqıǵanyń shyǵý tórkininiń yqtımal sebepterin de atap ótti. Onyń aıtýynsha, senbi kúni ótken Qaýipsizdik keńesiniń otyrysynda Memleket basshysy sońǵy 2-3 jyldyń ishinde jahandyq qarjy daǵdarysy tipti óte joǵary damyǵan elderdiń ózindegi jaǵdaıdy shıelenistirip jibergendigin baıqaǵandyǵyn atap ótken. Dál jańaózendegideı oqıǵa aǵymdaǵy jyldyń tamyz aıynda Londonda da oryn alǵan bolatyn. Onda da adamdar qaza taýyp, London turǵyndary ashyq tonaýshylyqqa bardy, avtomobılder men ǵımarattardy órtedi. Osyǵan uqsas oqıǵalar Grekııada da oryn aldy.
«Desek te, qarjylyq daǵdarys áleýmettik qaqtyǵystardy barynsha shıelenistirip jiberdi jáne de ókinishke oraı TMD-daǵy baqýattylyq pen gúldenýdiń aralyna aınalǵan bizdiń elimiz de táýelsizdigimizdiń 20 jyldyǵyn merekeleý kúni dál sondaı jaǵdaıdan aınalyp óte almady», - dedi E.Ertisbaev.
