Jańaózende kún men jel ári gaz energııasyn paıdalanatyn gıbrıdti stansa salynady
ASTANA. KAZINFORM — Qazaqstan Respýblıkasynyń Energetıka mınıstri Erlan Aqkenjenov Italııanyń Qazaqstandaǵy Tótenshe jáne Ókiletti Elshisi Antonello De Rıýmen kezdesti. Kezdesý barysynda memleket basshylary deńgeıinde qabyldanǵan birlesken bastamalardyń júzege asyrylý barysy talqylanyp, aldaǵy yntymaqtastyqtyń basym baǵyttary aıqyndaldy. Bul týraly vedomstvonyń baspasóz qyzmeti málim etti.
Mınıstrdiń aıtýynsha, Italııa Qazaqstan úshin senimdi seriktes bolyp qala beredi. Qazir eki el arasyndaǵy dıalog naqty ındýstrııalyq jobalarǵa ulasyp otyr.
Kezdesýde resýrstyq bazany keńeıtýge de erekshe mán berildi. 2026 jyldyń qańtarynda QazaqGaz jáne Eni kompanııalary Kaspıı mańy basseınindegi «Kamenkovskıı» ýchaskesin zertteýdiń praktıkalyq kezeńine kiristi. Sonymen qatar «Ońtústik Shý-Sarysý» jáne «Bereke» ýchaskeleri boıynsha jumystar jalǵasyp jatyr.
— Qashaǵan men Qarashyǵanaqtaǵy yntymaqtastyqtan bólek, munaı-gaz hımııa salasyn damytýǵa da nazar aýdarylyp otyr. «Polıetılen» jobasy aıasynda ıtalııalyq Maire Tecnimont kompanııasy basqaratyn konsortsıým polımerleý qondyrǵysy men gazdy bólý kesheninde qurylys-montaj jumystaryn bastady, — delingen habarlamada.
Energetıkalyq transformatsııa baǵytynda Jańaózende Eni kompanııasymen birge qýaty 247 MVt bolatyn gıbrıdti elektr stansasy salynyp jatyr. Bul nysan kún, jel jáne gaz energııasyn bir júıede paıdalanady. Alǵashqy nátıje de bar: 2025 jyldyń qyrkúıeginde 80 myń kún paneli ornatylǵan stansa iske qosylyp, taza elektr óndire bastady. 2026 jyldyń sońyna deıin gaz jáne jel qondyrǵylary da qoldanysqa beriledi. Bul Mańǵystaý oblysyndaǵy munaı-gaz nysandarynyń, sonyń ishinde «Ózenmunaıgaz» jáne QazGÓZ kásiporyndarynyń energetıkalyq qaýipsizdigin qamtamasyz etedi.
Dástúrli energetıka salasynda Ansaldo Energia kompanııasymen seriktestik aıasynda Almaty JEO-3-te jańa gaz týrbınalary ornatylýda. Qajetti jabdyq bıyl qańtarda stansa alańyna jetkizildi.
Kezdesý qorytyndysynda Qazaqstan tarapy elimizdiń otyn-energetıka keshenin damytý jobalaryna ıtalııalyq kompanııalardy tartýǵa daıyn ekenin bildirdi. Bul qadam eldiń energetıkalyq júıesiniń senimdiligi men ekologııalyq tıimdiligin arttyrýǵa baǵyttalǵan.
Aıta keteıik, buǵan deıin Qazaqstan men AQSh energetıka salasyndaǵy yntymaqtastyqty kúsheıtýge nıetti ekenin jazdyq.
