Jańaózende qýaty 50 MVt kún elektr stansasy iske qosyldy

ASTANA. KAZINFORM – Jańaózen qalasynda qýaty 50 MVt kún elektr stansasy paıdalanýǵa berildi. Joba «QazMunaıGaz» UK AQ jáne ıtalııalyq Eni S.p.A. energetıkalyq kompanııasynyń birlesken kúshimen júzege asyryldy.

Resmı ashylý rásimine Parlament Májilisiniń depýtaty Edil Jańbyrshın, «QazMunaıGaz» UK AQ basqarma tóraǵasy Ashat Hasenov, «Samuryq-Qazyna» AQ munaı-gaz aktıvteri departamentiniń dırektory Jandos Qaırgeldi, Eni kompanııasynyń Qazaqstandaǵy basshysy Seger Hoıtınk, Plenitude Qazaqstan basqarýshy dırektory Federıko Pýleze jáne Plenitude kompanııasynyń jańartylatyn energııa kózderi bóliminiń basshysy Alessandro Della Soppa qatysty.

Bul nysan jalpy qýaty 247 MVt bolatyn Gıbrıdti elektr stansasyn salý jobasynyń alǵashqy kezeńi bolyp otyr. Jańa kún elektr stansasy zamanaýı fotoelektrlik tehnologııamen jabdyqtalǵan. 80 gektar aýmaqqa LONGi kompanııasynyń 80 myńnan astam qosjaqty kún paneli ornatylǵan.

- Bul keshen jylyna shamamen 86 mln kVt/saǵ ekologııalyq taza energııa óndiredi.

Gıbrıdti konfıgýratsııa jańartylatyn energııa kózderin gaz generatsııasymen biriktiredi. Bul aýa raıynyń qubylmaly jaǵdaıynda da turaqty energııa qýatyn qamtamasyz etýge múmkindik beredi, - dep jazdy ákimdikten.

Qurylys jumystaryna 250-ge deıin maman tartylǵan bolsa, qazirgi ýaqytta gaz elektr stansasyn salý alańynda 122 qyzmetker jumys istep jatyr.

Kún elektr stansasy «QazMunaıGazdyń» óńirdegi enshiles kásiporyndary – «Ózenmunaıgaz» AQ men «Qazaq gaz óńdeý zaýyty» JShS-in elektr qýatymen qamtyp, óndiristik protsesterdiń turaqtylyǵyn qamtamasyz etetin bolady.

Aıta keteıik, Mańǵystaýda qýaty 150 mln tekshe metrlik jańa gaz jobasy iske qosyldy.