Jańaózende koronavırýspen aýyrǵan sońǵy naýqas emdelip shyqty
«Jańaózendegi ınfektsııalyq gospıtalde 200-den astam naýqas em qabyldaǵan. Koronavırýspen aýyrǵan sońǵy naýqas emdelip shyqty. Degenmen, dárigerler turǵyndardy saqtyq sharalaryn qatań saqtaýǵa shaqyrady. Óıtkeni, qazir provızorlyq ortalyqta 10 adam pnevmonııa dıagnozymen em qabyldap jatyr», delingen habarlamada.
Dárigerler adam kóp jınalatyn jerlerge barýdan bas tartýdy, kúzde tumaý maýsymy kezinde saq bolýdy eskertedi.
«Álde de bosańsýǵa bolmaıdy. Sebebi, koronavırýs ınfektsııasynyń shilde, tamyz, maýsym aılarynda halyqqa tıgen zardabyn shet jaǵasyn kórdińiz. Sony qaıtalamaý úshin biz qazirgi tańda saq bolýymyz qajet. Adam kóp shoǵyrlanatyn jerlerde toı-sadaqalarǵa halyqtyń álde de barmaǵany durys. Kúzde jedel respıratorly ınfektsııamen qosylyp koronavırýsty ınfektsııasy taralady degen boljam áli de seıilgen joq», - Jańaózen qalalyq bas dárigeriniń mindetin atqarýshy Jańabaı Ońaıbaev.
Qazir Jańaózende provızorlyq statsıonarlardyń materıaldyq-tehnıkalyq bazalaryn jaqsartý júrgizilip jatyr. Aldaǵy ýaqytta «Munaıshy» klınıkasynda 60 tósek provızorlyq statsıonar jasaqtalady. Onda kompıýterlik tomografııa men rentgen apparaty satyp alynyp jatyr. Bul maqsatqa demeýshiler esebinen 1 mlrd 246 mln teńge qarastyrylǵan.