Jańaózende koronavırýs týraly jalǵan habar taratqan medbıke jumystan ketedi

JAŃAÓZEN. QazAqparat – Messenjerde koronavırýs týraly jalǵan habar taratqan Jańaózen qalalyq aýrýhanasynyń medbıkesi elden keshirim surady, dep habarlaıdy QazAqparat jergilikti Lada.kz portalyna silteme jasap.

Búgin Jańaózen aýrýhanasynda koronavırýs juqtyrǵan adam bar degen habar WhatsApp arqyly tez tarap ketti. Mańǵystaý oblystyq densaýlyq saqtaý basqarmasy bul aqparatty joqqa shyǵaryp, Jańaózende koronavırýs ınfektsııasyn juqtyrý oqıǵasy tirkelmegenin jetkizdi.

Keıinnen jalǵan habardy taratqan áıeldiń kim ekeni anyqtaldy. Ol – qalalyq aýrýhananyń medbıkesi Arýhan Shyraqbaeva bolyp shyqty.

Ol bul áreketin týystaryna arnalǵan qaljyń dep túsindirdi. Arýhan Shyraqbaeva messenjerdegi habarlamasynda Ońtústik Koreıa astanasy Seýlden kelgen stýdent qyz koronavırýs kúdigimen aýrýhanada jatqanyn aıtqan. Biraq ol aýdıohabarlamany osynshama tez jáne jan-jaqqa tarap ketedi dep oılamaǵan.

Ol Jańaózen turǵyndaryna arnap vıdeo túsirip, keshirim surady.

«Habarlamada aıtylǵan málimet shyndyqqa janaspaıdy. Men Jańaózen turǵyndarynan keshirim suraımyn», - deıdi Arýhan Shyraqbaeva.

Mańǵystaý oblystyq densaýlyq saqtaý basqarmasynyń málimetinshe, atalǵan medbıke óz erkimen jumystan shyǵý jóninde ótinish jazǵan.