Jańaózende kópbalaly analar óz kásibin ashty
Oblystaǵy turmys deńgeıi tómen, az qamtylǵan otbasylardyń jeke kásip ashýyna múmkindik týǵyzyp, qajetti qural jabdyqtar men kerekti aqparattar bere otyryp áleýmettik jaǵdaıyn jaqsartýdy kózdegen joba jetekshisi, belgili kásipker Aıjanı Nurlanova eń aldymen bul sharanyń Mańǵystaý oblysy ákimi Eraly Toǵjanov pen osy óńirdegi iri kompanııalardan qoldaý tapqanyn aıtty.
Qazirgi tańda, atalǵan joba barysynda oblys boıynsha 50-den astam otbasy óz jeke kásibiniń ıesi bolyp, kúnkóris deńgeıi jaqsardy. Áli de Jańaózen qalasyndaǵy 100 otbasyǵa qoldaý kórsetilmek. Bul oraıda, eń aldymen nıet bildirýshi analardyń oı-pikirleri, usynystary tyńdalyp, soǵan sáıkes baǵyttar beriledi. Jeke kásibin dóńgelentýge qajetti barlyq qural-saımandar, materıaldar, zamanaýı tehnıkalar alynyp qana qoımaı, ónimderin brendke aınaldyrý maqsatynda árqaısysyna jeke logotıp jasaldy, qaladaǵy iri oıyn-saýyq oryndarynan saýda núkteleri berildi.
On jyldan beri tiginshilikpen aınalysyp, kópten beri jeke kásibin arman etken analardyń biri - Anapııa Igibaeva.
«Joldasym ekeýmiz oblys ákiminiń qabyldaýynda bolyp, munaı salasynan jumys surap barǵanbyz. Eraly Toǵjanov jeke kásip ashýǵa múmkinshilik bar ekenin aıtyp, Aıjanı degen qyzben tanystyrdy. Basynda biz onsha senbedik. Eshkimniń qolyna qaramaı, óz kásibimizdi bastap, bir jetistikke jetsek degen armanymyz osy jobanyń arqasynda oryndalyp otyr. Búginde, mine ózderińiz kórip otyrǵandaı, Allanyń qalaýymen jáne «Jaqsylyq jasa, qaıyrymy qaıtar Alladan» jobasynyń arqasynda jeke kásipkermin. Endi shaǵyn tigin sheberhanam bar, ol zamanýı tigin mashınalarmen jabdyqtalǵan. Endi tek erinbeı eńbek etý ǵana qalyp tur», - deıdi ol.
Joba uıymdastyrýshylaryna alǵys aıtqan kelesi ana - Teńge aýylynda turatyn Gúlsim Alshora. Eki múgedek bala tárbıelep otyrǵan kópbalaly ana atalmysh joba aıasynda «Zere» belgisimen halyqqa ártúrli úı pisirmelerin usynatyn boldy. Jeke kásipkerge kásibine qajetti barlyq kerek-jaraqtary alynyp berildi.
«Osydan onshaqty kún buryn oblys ákiminiń qolynan 1 bólmeli páterdiń kiltin alsaq, endi óz jeke kásibimdi ashyp, odan ári damytýǵa tamasha múmkindik berilip tur. Men eshqashanda ózimniń jeke brendim bolady dep oılaǵan emespin. Turmysy tómen, az qamtylǵan otbasylardy nazardan tys qaldyrmaı, jan-jaqty qoldaý kórsetip júrgen azamattarǵa alǵystan basqa aıtarym joq»,-degen Gúlsim Alshora analyq aq tilegin jetkizdi.
Joba jetekshisi Aıjanı Nýrlanovanyń aıtýynsha, Elbasymyz «Nur Otan» partııasynyń kezekti HVIII sezinde áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeıtý baǵytynda kóptegen tapsyrmalar berdi.
«Jaqsylyq jasa, qaıyrymy qaıtar Alladan» jobasy tikeleı Elbasy tapsyrmasynyń oryndalýy dep bilem jáne osy jobamnyń Mańǵystaý oblysynan bastaý alyp, osyndaı nátıje kórsetkeni - men úshin úlken jetistik. Qanshama qınalǵan jannyń qýanyshty sátin kórý, olarǵa úmit otyn syılap, jeke kásipker atanýyna sebepker bolý - men úshin úlken baqyt. Bıznestiń dámin tatyp, tabys taba bastaǵan jandar óz kásibiń bolǵan rahat eken deıdi. Qazirgi tańda bir Jańaózen qalasynda birneshe jańa brend paıda boldy. Aıta ketsem ZERE aspazdyq ónimderi, XAN BIBI atelier tigin sheberhanasy, ALITORT kondıterlik ónimi, OZEN NAN nan ónimderi, jylyjaılar, qus sharýashylyǵy, basqa da kásip túrleri ashyldy. Biz óz jumysymyzdy toqtatpaımyz, halyqqa qoldan kelgenshe kómek qolyn sozamyz», - deıdi ol.
Aldaǵy ýaqytta da áleýmettik salada júzege asyrylatyn osy sekildi tyń bastamalar kóbeıe bermek.
