Jańaózende qaza bolǵan adamdardyń keıbirine ańshy myltyǵynyń oǵy tıgen - N. Súıindikov
ASTANA. 20 jeltoqsan. QazAqparat /Rýslan Ǵabbasov/ - Jańaózende qaza bolǵan adamdardyń keıbirine ańshy myltyǵynyń oǵy tıgen.
Bul týraly búgin Astanada ótken brıfıngte Bas prokýratýranyń resmı ókili Nurdáýlet Súıindikov málim etti.
Jańaózendegi tártipsizdik barysynda qaza bolǵan 14 adamǵa toqtalǵan resmı ókil: «Tergeý qazirgi kezde júrgizilip jatyr. Onyń árqaısysynyń qandaı mán-jaıda qurban bolǵandyǵy anyqtalady», dedi. «Osy qaıtys bolǵandardyń ishinde bytyraly atys qarýynan (ańshy myltyǵy) oq tıgender bar. Atap aıtqanda, polıtsııa, quqyq qorǵaý organdarynyń qyzmetkerleri bytyraly atys qarýyn paıdalanbaıdy. Olar azamattyq qarý bolyp tabylady, ıaǵnı qyzmettik qarýǵa jatpaıdy», dedi N.Súıindikov. Osy oraıda ol, tekserýdiń aldyn ala málimetteri boıynsha, qaıtys bolǵan 14 adamnyń ishinde polıtsııanyń, quqyq qorǵaý organdarynyń áreketterimen baılanysty emes faktilerden mert bolǵan azamattar bar ekenin jetkizdi. «Tergeý barysynda árbir qaza bolǵan azamat boıynsha naqty quqyqtyq baǵa beriletin bolady», dep túıendedi resmı ókil.
