Jańaózende káriz júıesin jóndeýge barǵan 2 jumysshy ajal qushty

AQTAÝ. QazAqparat – Mańǵystaý oblysy Jańaózen qalasynda káriz júıesin jóndeýge barǵan 2 jumysshy ajal qushty, dep habarlaıdy QazAqparat tilshisi.

«Samal» shaǵyn aýdany №20 úıdiń jertólesine káriz júıesin jóndeýge barǵan 2 jumysshy toqqa túsip, qaıtys boldy. Kóz jumǵandar (Qanalıev Erjan – 1975 jylǵy, Qýanysh Serikov – 1970 jylǵy) — «Kommýnaldyq qyzmetter» JShS qyzmetkerleri. Mańǵystaý oblystyq jedel jáne shuǵyl medıtsınalyq stantsııasynyń Jańaózen qalasyndaǵy fılıalyna 14:46 shamasynda shaqyrý kelgen. Feldsherler 14:50-de oqıǵa ornynda bolyp, olardyń ólimin tirkegen.

Oqıǵa ornyna qala ákimi Maqsat Ibaǵarov baryp, jaǵdaıymen tanysyp, marqumdardyń týǵan-týystaryna kóńil aıtty.