Jańaózende ekijaqty kelissóz nátıjesinde 350 adam jumysqa turatyn boldy

JAŃAÓZEN. QazAqparat - Jańaózende jumysqa ornalastyrý máselesi jónindegi komıssııa janynan halyqtyq baqylaý toby quryldy, dep habarlaıdy QazAqparat.

Mańǵystaý oblysy ákiminiń birinshi orynbasary Abzal Meńdibaev bastaǵan jumys toby bastamashyl toppen kelissózder júrgizip, máseleni sheshýdiń úsh baǵyty boıynsha jospar usynǵan bolatyn.

Eki tarap arasyndaǵy kelissóz nátıjesi belgili boldy.

Qalalyq jumyspen qamtý ortalyǵynda 5 sanat boıynsha kezekte turǵan 150 azamatty qoldanystaǵy algorıtm negizinde jumysqa qabyldaý josparlanyp otyr.

Sondaı-aq, «ÓzenMunaıGaz» AQ-na servıstik qyzmet kórsetetin mekemelerde jańadan qurylatyn 150 jumys ornyna halyqtyń áleýmettik osal tobyna jatatyn turǵyndardy jumysqa ornalastyrý kózdelip otyr.

Osy maqsatta halyqtyq baqylaý toby quryldy. Azamattar jumysqa úmitker turǵyndardy ózara iriktep, usynady.

Aıta keteıik, Jańaózen qalasynyń jumyspen qamtý bóliminiń «Jumys jasaımyn» baǵdarlamasy aıasynda bıyl naýryz aıynan bastap shaǵyn jáne orta bıznes sýbektileri qosymsha 50 jumys ornyn ashady.

Eki tarap arasyndaǵy kelissóz qorytyndysy boıynsha 350 adam jumysqa ornalastyrylady.

Bul baǵyttaǵy jumys áli de jalǵasady.