Jańaózende dáriger pyshaq jaraqatynan mert boldy

AQTAÝ. KAZINFORM — Mańǵystaý oblysy Jańaózen qalasynda búgin 28 qańtarda saǵat shamamen 14:00-de medıtsınalyq mekemeniń dálizinde terapevt dárigerge er adam shabýyl jasap, aýyr pyshaq jaraqatyn salǵan. Sonyń saldarynan 29 jastaǵy jas maman qaza tapty.

Oblystyq polıtsııa departamentiniń habarlaýynsha, kisi óltirýge kúdikti ýaqytsha ustaý ızolıatoryna qamalǵan.

-28 qańtar kúni Jańaózen qalasynda pyshaq jaraqaty saldarynan 29 jastaǵy er adam kóz jumdy. Aldyn ala anyqtalǵandaı, qaqtyǵys er adamdar arasynda otbasylyq-turmystyq janjal negizinde týyndaǵan. Oqıǵadan keıin kúdikti Jańaózen qalalyq polıtsııa basqarmasyna óz erkimen kelip, jasaǵan isin moıyndaǵan. Atalǵan derek boıynsha polıtsııa Qazaqstan Respýblıkasy Qylmystyq kodeksiniń 99-baby 1-bóligi boıynsha qylmystyq is qozǵady, - delingen habarlamada.

Qazirgi ýaqytta bolǵan oqıǵanyń barlyq mán-jaıyn jan-jaqty, tolyq jáne obektıvti túrde anyqtaýǵa baǵyttalǵan tergeý sharalary bastalǵan.

Buǵan deıin, Almatyda 16 jastaǵy jasóspirimniń ólimine qatysty qylmystyq is qozǵalǵanyn jazǵan bolatynbyz.