Jańaózende bopsalaý kúdigimen er adam qamaýǵa alyndy
ASTANA. KAZINFORM — Mańǵystaý oblysy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri JQAJ jáne Jańaózen qalasynyń krımınaldyq polıtsııa qyzmetkerlerimen birlesip, 31 jastaǵy er adamdy ustady. Bul týraly Polisia.kz jazdy.
— Tergeý materıaldaryna sáıkes, kúdikti ózge adamdarmen birge kúsh qoldaný jáne qorqytý arqyly jábirlenýshiden 200 myń teńge aqsha alǵan. Keıin oǵan «qorǵaý jáne qamqorlyq» kórsetemiz degen syltaýmen aı saıyn 100 myń teńge tóleýdi talap etken. Ýaqyt óte talap etilgen soma 500 myń teńgege deıin ósken. Jábirlenýshi polıtsııaǵa júgingennen keıin kúdikti jedel túrde ustaldy, — delingen habarlamada.
Onyń janynan arnaıy tańbalanǵan 60 myń teńge kólemindegi aqsha tárkilendi. Atalǵan derek boıynsha Qazaqstan Respýblıkasy Qylmystyq kodeksiniń 194-babynyń 2-bóligimen qylmystyq is qozǵaldy. Sottyń sanktsııasymen kúdikti qamaýǵa alynyp, tergeý ızolıatoryna qamaldy. Qazirgi ýaqytta qylmystyq istiń barlyq mán-jaıyn anyqtaýǵa baǵyttalǵan tergeý amaldary júrgizilip jatyr.
Aıta keteıik, buǵan deıin Aqtóbede bopsalaý jáne tonaýmen aınalysqan 7 kúdikti ustalǵan bolatyn.
