Jańaózende azyq-túlik tapshylyǵy baıqalmaıdy - Ó.Shókeev
ASTANA. 20 jeltoqsan. QazAqparat /Marlan Jıembaı/ - Jańaózende azyq-túlik tapshylyǵy baıqalmaıdy.
Bul týraly búgin Úkimet otyrysynda Aqtaýdan tikeleı beıne baılanysqa shyqqan QR Premer-Mınıstriniń birinshi orynbasary Ómirzaq Shókeev málim etti.
«Biz qazir ǵana qalada boldyq, saýda núkteleri óz jumystaryn bastap, qalypty jaǵdaıda jumys isteýde. Qazirgi kúni azyq-túlik tapshylyǵy baıqalmaıdy, sonymen qatar baǵa ósimi bilinbeıdi. Degenmen et ónimderiniń qosymsha kólemin jetkizýde irkilister bar», dedi ol.
Onyń aıtýynsha, óńirde jumys istep jatqan úkimettik komıssııa et ónimderimen qamtamasyz etýge jaýapty retinde «Kaspıı» ÁKK-in, ákimdikti jáne Aýyl sharýashylyǵy mınıstrligin bekitken. Naýbaıhanalar qajetti unmen qamtamsyz etilip, nan óimderin jetkizýde problemalar týyndap otyrǵan joq.
«Ákimdik, «Kaspıı» ÁKK jáne «QazMunaıGazǵa» kúnsaıynǵy azyq-túlik jármeńkesin uıymdastyrý tapsyryldy jáne bul másele bizdiń komıssııanyń turaqty nazarynda bolady», - dedi Ó.Shókeev.
Birinshi vıtse-premerdiń basa aıtýynsha, qala halqyn úzdiksiz azyq-túlikpen qamtamasyz etý maqsatynda Aýyl sharýashylyǵy mınıstrligi men «Qazagro» holdıngi tarapynan 570 mln. teńge qarjy bólingen.
