Jańaózende avtojoldy japqan jumysshylar jaýapqa tartyla ma

ASTANA. QazAqparat – Kólik jolyn japqan jańaózendik jumysshylardyń talaby qandaı boldy? Bul saýalǵa Bas prokýrordyń orynbasary Jandos Ómirálıev jaýap berdi, dep habarlaıdy QazAqparat tilshisi.

«Eger siz Jańaózen qalasynda ustalǵan 30-40 adam týraly aıtyp otyrsańyz, ıá, joldy japqandary polıtsııaǵa jetkizildi. Sebebi olar kólik quraldarynyń qozǵalysyna kedergi keltirdi. Olardyń aktsııasy Astana qalasyndaǵy «BerÁli Mańǵystaý Company» JShS qyzmetkerleriniń jınalýymen baılanysty emes», - dedi Jandos Ómiralıev Májilistiń jalpy otyrysynan keıin jýrnalısterdiń suraqtaryna jaýap bere otyryp.

Onyń aıtýynsha, Jańaózende joldy japqandar polıtsııaǵa jetkizilip, profılaktıkalyq áńgimelesýden keıin barlyǵy bosatyldy.

«Polıtsııaǵa jetkizilgenderdiń eshqaısysy jaýapqa tartylǵan joq. Olar ózderiniń jumysqa ornalasý máselelerin alǵa tartty», - dedi Jandos Ómiralıev.

Buǵan deıin Bas prokýrordyń orynbasary elordada zańsyz narazylyqqa shyqqan bes jańaózendikke eskertý jasalyp, polıtsııa bólimshesinen bosatylǵany týraly aıtqan edi. Keshe keshke Astanada ustalǵan ózge de mańǵystaýlyqtar bosatylyp, búgin tańerteń Jańaózen qalasyna júrip ketti.