Mańǵystaý oblysynda aýrýhanaǵa bólingen 223 mln teńgeni jymqyrý isi boıynsha 3 adam qamaldy
ASTANA. KAZINFORM – Qarjylyq monıtorıng agenttiginiń Mańǵystaý oblysy boıynsha departamenti Jańaózen qalalyq kópbeıindi aýrýhanasyna kúıik bólimshesin ashýǵa bólingen 223 mln teńge demeýshilik qarajatty jymqyrý deregi boıynsha tergeý júrgizip jatyr.
Agenttik taratqan málimetterge qaraǵanda, zańsyz áreketke qalalyq aýrýhana dırektorynyń orynbasary, «Jarylqaý» qoǵamdyq qorynyń basshysy, Jańaózen qalasy ákiminiń burynǵy orynbasary jáne ónim berýshi qatysty dep kúdik keltirilip otyr. Qazirgi tańda úsh kúdikti qamaýǵa alyndy.
2025 jyly «QazMunaıGaz» UK» AQ demeýshilik retinde bólingen 223 mln teńgeni «ÓzenMunaıGaz» AQ arqyly «Jarylqaý» qoryna aýdarǵan. Bastapqyda segiz túrli medıtsınalyq jabdyq satyp alý kózdelgenimen, keıin shart ózgerip, 210 mln teńgege nebári eki arnaıy kereýet satyp alý jóninde kelisim jasalǵan.
Satyp alý Biryńǵaı dıstrıbıýtordy aınalyp ótip, zań talaptaryn buzý arqyly júzege asyrylǵan. Tergeý nusqasy boıynsha jabdyq satyp alýǵa is júzinde 92 mln teńge jumsalyp, qalǵan qarajat úlestes kásiporyndar arqyly qolma-qol aqshaǵa aınaldyrylǵan. «AKBS Invest» JShS ókili qylmystyq jolmen kelgen aqshaǵa Astanadan páter satyp alyp, ony úshinshi tulǵalarǵa rásimdegen.
Sot sanktsııasymen kúdiktilerdiń múlkine, sonyń ishinde 3 páterge, 2 turǵyn úıge jáne avtokólikke tyıym salyndy. Jańaózen qalasy ákiminiń burynǵy orynbasaryna qatysty QR Qylmystyq kodeksiniń 361-baby boıynsha laýazymdyq ókilettikterin teris paıdalaný deregimen tergeý bastaldy.
QR Qylmystyq-protsestik kodeksiniń 201-babyna sáıkes ózge aqparat jarııa etilmeıdi.
