Jańaózende atyshýly oqıǵaǵa baılanysty sot isi bastaldy
AQTAÝ. QazAqparat - Jańaózen qalalyq sotynda osydan 6 aı buryn Teńge aýyly mańynda bolǵan teplovoz ben «Gazel» kóliginiń soqtyǵysýyna kinálilerge qatysty sot isi bastaldy, dep xabarlaıdy QazAqparat.
Sol apat saldarynan 9 adam qaza taýyp, 27-si túrli jaraqattanǵan bolatyn.
Ázirshe «Qazaqstan temir joly» Jańaózen ótkel kezekshisi E.T. esimdi azamat kúdikti sanalyp otyr. Onyń ústinen QR Qylmystyq kodeksi 344-baby 3-bóligimen is qozǵaldy.
Jańaózen qalalyq sotynyń málimdeýinshe, sotqa deıingi júrgizilgen tergeýde anyqtalǵandaı, 25.11.2017 jyly saǵat 12.00 shamasynda kezekshiliginde turǵan E. T Ózen stantsııasyna qaraı 65 km/saǵ jyldamdyqpen kele jatqan teplovozǵa qaýip joqtyǵy týraly belgi bergen. Osy kezde temirjol ótkelinde avtomatty túrde dybys sıgnaly jáne baǵdarsham iske qosylǵan. Alaıda, kezekshi shlagbaýymdy tiregishine symmen baılap tastaǵandyqtan, shlagbaým túspegen jáne ótkel bóget qurylǵysy (ÝZP) kóterilmegen.
E.T. mas kúıinde dybys sıgnalynyń qosylǵanyna qaramastan shlagbaýmdy tómen túsirýge árekettenbegen.
Saldarynan Jańaózen qalasynan Teńge kentine qaraı temirjol ótkelinen ótip bara jatqan №3 baǵdaryndaǵy jolaýshylar tasymaldaıtyn «GAZ-322132» markaly avtokólik tyıym salynǵan jol belgisine ótip ketip, teplovozben soqtyǵysqan. Oqıǵa saldarynan 9 adam aýyr dene jaraqattarynan kóz jumǵan jáne 27 adam aýrýhanaǵa jetkizilgen.
