Jańaózende ashtyq jarııalaǵan jumyssyzdarǵa bos jumys oryndary usynyldy

AQTAÝ. QazAqparat - Ashtyq jarııalaǵan Jańaózen turǵyndaryna «Jumys jasaımyn» óńirlik baǵdarlamasy aıasynda jumysqa ornalasýdyń túrli nusqalary usynyldy.

Bul týraly Jańaózen qalasy ákimdiginiń baspasóz qyzmeti málim etti, dep habarlaıdy QazAqparat tilshisi.

Qazirgi ýaqytta Jańaózendegi 13 kompanııa 200-den astam túrli baǵytta bos jumys oryndaryn usyndy. Onyń ishinde sáýletshi, óndiris ınjeneri, call-ortalyq operatory, kassır-býhgalter, ashana qyzmetkeri, avtoslesar, menedjer, elektrık, satý menedjeri, klıenttermen jumys jónindegi menedjer, satýshy, tazalyq qyzmetkeri, ákimshi jáne t. b. bar.

«Usynylǵan bos jumys oryndarynyń eń joǵarǵy jalaqysy 280 myń teńge, laýazymyna, biliktiliginiń bolýyna baılanysty eń tómengi jalaqy 140 myń teńge» delingen baspasóz málimetinde.

Kóptegen bos jumys oryndary úshin joǵary bilim qajet emes.

Jańaózen qalasy ákimdiginiń qyzmetkerleri jınalǵandarǵa qolda bar jumys oryndaryna jumysqa ornalasýdy jáne munaı-gaz salasyna jumysqa ornalasý algorıtmi sheńberinde óz kezegin kútýdi usyndy, alaıda jumyssyzdar jalpy kezekti aınalyp ótip «Ózenmunaıgaz» AQ-ǵa jumysqa ornalasýdy talap etip otyr.