Jańaózende «Arbat» ýrbanıstıkalyq ortalyǵy ashylady
Qala turǵyndarynyń demalýyna qolaıly jaǵdaı týǵyzý úshin qolǵa alynǵan jobanyń qurylysy búginde júrip jatyr.
«Jobaǵa sáıkes Qosqulaqov kóshesi men Sátbaev kóshesine deıin jáne Qosqulaqov kóshesinen Órken shaǵynaýdanynyń №1 úıine deıingi aýmaqta qurylys jumystary júrip jatyr. Qoǵamdyq orynnyń jalpy aýmaǵy 10 myń sharshy metrdi quraıdy», - dep málim etti Jańaózen qalasy ákimdiginiń baspasóz qyzmetinen.
Ortalyqta tabıǵı aǵashtan jasalǵan 2 oıyn alańy, ártúrli átkenshekter, sýburqaq, 2 strıtbol alańshasy, jaıaý júrginshiler joly bolady. Sondaı-aq kóleńkeli shatyrlar men saýda pavılondaryn ornatý qarastyrylǵan. Aýmaq tolyqtaı kógaldandyrylady.
Qurylys jumystaryn qala quraýshy kompanııa qarjylandyrǵan.
Osyǵan deıin Aqtaý qalasynda da aýmaǵy 23 gektar bolatyn ortalyq saıabaq salynyp jatqanyn jazǵan edik.
