Jańaózende 61 jańa jumys orny qurylyp, taǵy 100 adamdy jumysqa ornalastyrý josparlanýda

JAŃAÓZEN. QazAqparat -8 aqpannan bastap Mańǵystaý oblysy ákiminiń birinshi orynbasary Abzal Meńdibaevtyń tóraǵalyǵymen Jańaózen qalasynda halyqty jumyspen qamtý máseleleri jónindegi oblystyq komıssııa jumysyn bastady, dep habarlaıdy QazAqparat.

Komıssııa quramyna memlekettik organdardyń, «QazMunaıGaz» UK» AQ, «Ózenmunaıgaz» AQ ókilderi kirdi.

Arnaıy qurylǵan oblystyq komıssııa bastamashyl top ókilderimen kezdesip, halyqty jumyspen qamtý máselelerin talqylady. Eki tarap ta ózekti máselelerdi jan-jaqty qarastyryp, kelip túsken usynystardy zerttedi.

Nátıjesinde oblystyq komıssııa jumyssyz azamattardy 3 baǵyt boıynsha jumysqa ornalastyrý týraly sheshim qabyldady.

Atap aıtqanda:

Qazir qalalyq jumyspen qamtý ortalyǵy arqyly «Ózenmunaıgaz» AQ-da 100, servıstik qyzmet kórsetetin seriktestikterde 61 jańa jumys orny qurylyp, halyqtyń osal toptaryna jatatyn azamattardy jumysqa ornalastyrý josparlanyp otyr.

Bul baǵytta arnaıy komıssııanyń sheshimine sáıkes, 2022 jyldyń aqpan aıyndaǵy jaǵdaı boıynsha qoldanystaǵy algorıtm negizinde 5 sanat boıynsha kezekte turǵan 100 adamdy jumysqa ornalastyrý josparlanýda. Jyl sońyna deıin 400-den astam adamdy jumyspen qamtý kózdelip otyr. Osy algorıtm boıynsha tıisti sharalar aldaǵy ýaqytta da jalǵasatyn bolady.

Jańadan qurylatyn 61 jumys ornyna úmitkerler jumyssyz azamattar qatarynan iriktelip, «Ózenmunaıgaz» AQ servıstik qyzmet kórsetý mekemelerine («KEZBI», «ÓzenPromGeofızıka», «BatysGeofızServıs», «AlıansOılServıs», «KazPromTehKompanı», «Semser-Órt sóndirýshi», «KUNAN-HOLDING» JShS) jumysqa qabyldanady.

Jańaózen qalalyq jumyspen qamtý ortalyǵynda 5 sanat boıynsha jáne orta merzimdi kezeń boıynsha kezekte turǵan azamattardy eńbekpen qamtý jumystary jyl boıy jalǵasady.

Jańaózen qalasyndaǵy shaǵyn jáne orta bıznes ókilderin jumysqa tartý arqyly «Ózenmunaıgaz» AQ-na uzaq merzimdi talap etiletin jospar boıynsha túrli qyzmetter kórsetetin jeke kásipkerlerdi tartý arqyly jańa jumys oryndaryn qurý kózdelýde.

Osy maqsatta «QazMunaıGaz» UK» AQ men shaǵyn jáne orta bıznes ókilderi arasynda uzaq merzimdi kelisim-sharttar jasasý boıynsha jumys júrgizý týraly sheshim qabyldandy.

«Aýtstaffıng» mekemelerinde jumysqa qabyldaýdyń ortalyqtandyrylǵan júıesi aıasynda sońǵy 2 jylda 1 700 azamat jumysqa ornalasty. Bul, óz kezeginde, atalǵan algorıtmniń tıimdiligin kórsetti.

Oblystyq komıssııanyń basty mindeti – jumyspen qamtý algorıtminiń ashyqtyǵy men ádildigin qamtamasyz etý jáne jumyssyz azamattarǵa jumysqa ornalasýǵa múmkindik berýdi jalǵastyrý.

Bul jumys turaqty negizde júrgiziletin bolady.