Jańaózende 6 jylý qazandyǵy men 3 bý týrbınasy iske qosyldy
AQTAÝ. QazAqparat - Mańǵystaý oblysynyń ákimi Eraly Toǵjanov memleket basshysynyń «Óńirlerdi damytý» baǵdarlamasy aıasynda «ÓzenJylý» memlekettik kommýnaldyq kásipornyna baryp, 6 dana jylý qazandyǵy men 3 dana bý týrbınasyn iske qosty, dep habarlaıdy oblystyq ákimdiktiń baspasóz qyzmeti.
Kásiporyn munaıshylar qalasyn áleýmettik-ekonomıkalyq damytýdyń 2012-2020 jyldarǵa arnalǵan keshendi josparynyń aıasynda qala turǵyndaryn úzdiksiz jylýmen, ystyq sýmen jáne elektr energııasymen qamtamasyz etetin bolady. 
Conymen qatar, óńir basshysy «Jetibaı-Jańaózen-Kendirli-Túrikmenstan shekarasy» avtomobıl jolynyń 155-210 shaqyrymyndaǵy ýchaskesiniń ortasha jóndeý jumysymen tanysty. Bas merdiger - «Nurjol Invest» JShS. Jumystyń jalpy quny - 652 mıllıon 960 myń teńge. Búgingi kúni jaryqshaqtardy toltyrý, asfaltbetondy bir qabatty jabýdy jóndeý jumystary 155-170 jáne 193-210 shaqyrymdarda aıaqtaldy. Júrgizilgen jumystardyń jalpy sommasy - 328 mln. teńge.
Jumys sapary aıasynda Eraly Toǵjanov «Rahat», «Raýan», «Araı» shaǵyn aýdandarynda salynyp jatqan mektepterdiń qurylysymen tanysty. Olardyń árqaısysy 900 oryndyq. Bilim ordalarynyń qurylysy osy jyldyń shilde aıynda bastalǵan. Bul mektepter paıdalanýǵa berilgennen keıin 3 myńǵa jýyq bala jańa mekteptiń tabaldyryǵyn attaıtyn bolady. Oqý ordasynyń qurylysy kelesi jyldyń jetinshi aıynda aıaqtalýy tıis.
Oblys ákimi bastaǵan bir top delegatsııa «Kaspıı» zııatkerlik balabaqshasy men mektebiniń jumysymen tanysyp, oqytýshylar quramymen kezdesti. Bıyl ǵana jumysyn bastaǵan bilim ordasynda qazirgi kúni 147 oqýshyǵa 15 joǵary bilimdi maman dáris berýde. Mekeme memlekettik úshtildilik baǵdarlamasy boıynsha oqýshylardy oqytýda.
Odan soń óńir basshysy «Ońaltý ortalyǵy» memlekettik mekemesine bardy. Mekeme zamanaýı qurylǵylarmen tolyq jabdyqtalǵan. 320 balaǵa arnalǵan ortalyqtyń mindeti - ártúrli deńgeıdegi naýqas balalarǵa keshendi psıhologııalyq, medıtsınalyq jáne pedagogıkalyq kómek kórsetý.
