Jańaózende 6,5 myń adam jumysqa ornalasty

AQTAÝ. QazAqparat – Mańǵystaý oblysynyń Jańaózen qalasynda eń ózekti máselelerdiń biri – jumyssyzdyq. Jyl basynan beri jumyspen qamtý ortalyǵyna 11 060 adam habarlasyp, olardyń 6541-i eńbekke ornalastyrylǵan, dep habarlaıdy QazAqparat tilshisi.

Qala ákimi Maqsat Ibaǵarov málim etkendeı, 6541 adamnyń 4596-y turaqty jumysqa, 1443-i qoǵamdyq jáne 230-y áleýmettik jumysqa ornalastyryldy. 272 adam jastar tájirıbesi boıynsha jiberilgen. Bul kórsetkish ótken jylǵa qaraǵanda 1169 orynǵa kóp.

«Al 2020 jyly 4725 jumys orny qurylatyny josparlanyp otyr. Sonymen qatar, «Ózenmunaıgaz» AQ qarajaty esebinen «Ózenınvest» MKK-da shtat birligin ulǵaıtý arqyly qosymsha 350 jańa jumys orny qurylyp, jumyssyzdar esebinde turǵan azamattar jumyspen qamtyldy. Olardyń qyzmetiniń negizgi baǵyty - qalany abattandyrý, sport, balalar oıyn alańdary men saıabaqtaryn abattandyrý, kútip ustaý», - dedi Maqsat Ibaǵarov.

«Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan «Eńbek» baǵdarlamasynyń 1-shi baǵyty boıynsha qysqa merzimdi kásiptik oqýǵa 144 adam joldanyp, sonyń 115-i oqýlaryn aıaqtaǵan, 78 adam turaqty jumysqa ornalasty.

Sondaı-aq «Bastaý bıznes» jáne «Jas kásipker» jobalary boıynsha 680 adam kásipkerlik negizderine oqytylyp, sertıfıkattaryn aldy. 150 adam qaıtarymsyz grantqa ıe bolyp, 17 adamǵa nesıe berildi. «Nur-kapıtal» baǵdarlamasy aıasynda 1,4 mlrd teńgeni quraıtyn 70 joba maquldanyp, 608 jumys orny qurylady dep josparlanýda.