Jańaózende 5 balanyń anasy olardy tárbıeleýden bas tartty
AQTAÝ. QazAqparat - Mańǵystaý oblystyq kámelettik jasqa tolmaǵandar isi boıynsha mamandandyrylǵan aýdanaralyq sotynda burynǵy erli-zaıyptylardyń balalary kimmen qalatyny medıatıvtik kelisim boıynsha jasaldy. Endi 5 balany ákesi tárbıeleıdi. Al anasy bıznespen aınalysyp, balalaryn ósirýge bosamaıtyndyqtan kelisim bergen. Bul týraly «QazAqparat» HAA tilshisi habarlaıdy.
«Talapker óz ótinishinde kámeletke tolmaǵan bes balany ózimen qaldyrýdy suraǵan. Sebebi, olardyń anasy bala tárbıesimen aınalyspaıdy. Áıel saýda-sattyqpen aınalysyp, kóbinese taýar alyp kelýge ketedi, al balalary qaraýsyz qalǵan. Ákesiniń tabysy jaqsy, tek balalarynyń bolashaǵyn oılaıdy. Sot otyrysy barysynda taraptar medıatsııa jáne is júrgizýdi qysqartý barysynda daýdy (shıelenis) retteý týraly kelisimdi bekitý týraly ótinish bildirdi. Ekijaqty sheshim boıynsha balalar ákesimen qalatyn boldy. Ol alıment suramaǵan, demek anasy tólemeıtin bolady. Olardyń ekeýi de Jańaózen qalasynda turady», - dep aıtty Mańǵystaý oblystyq soty baspasóz qyzmetiniń ókili Gaýhar Nurhanova.
Ákesi, óz kezeginde, anasynyń balalarymen qarym-qatynas jasaýyna qarsylyq tanytpady. Úkim zańdy kúshine engen joq.
