Jańaózen munaıshylary Energetıka nemese Eńbekmın tarapynan kelissóz komıssııasyn qurýdy talap etti
«QazMunaıGaz» basshylyǵy men «BerAlı Mańǵystaý Company» JShS burynǵy jumysshylary ókilderiniń arasyndaǵy kelissózdiń aralyq qorytyndysy týraly aqparat beriletin jıynǵa munaıshylardan bólek «QazMunaıGaz» kompanııasynyń ókilderi keletini aldyn ala habarlanǵan bolatyn.
Alaıda baspasóz konferentsııada ulttyq kompanııa ókilderi tóbe kórsetpedi.
Osylaısha BAQ ókilderiniń saýaldaryna munaıshylardyń ókilderi men otyn-energetıka kesheni salalyq kásipodaǵynyń mamandary, quqyq qorǵaý uıymdarynyń zańgerleri ǵana jaýap berdi.
Jańaózendik ujymnyń atynan kelissóz júrgizip júrgen munaıshylardyń biri, bastamashyl top jetekshisi Jolmurat Ulyqpan 12 sáýirden beri «QazMunaıGaz» basshylyǵy men munaıshylar ortaq sheshimge kelmegenin, ózderi qoıǵan máseleniń eshbiri sheshimin tappaǵanyn málim etti.
«QazMunaıGazdyń» bizge búgin bergen jaýaby osyǵan deıin ótken kelissózderdi qorytyndylaıtyn hattamanyń bári eńbek daýyna jatpaıdy degenge saıady. Osyǵan baılanysty biz Energetıka mınıstrilginiń nemese Eńbek jáne halyqty áleýmettik qorǵaý mınıstrliginiń buıryǵymen komıssııa qurýdy talap etip otyrmyz. Qazirgi kezdeýlerimizdiń hattamasyna «QazMunaıGaz» basshysynyń orynbasarlary tóraǵa retinde qatysyp keldi. Biz ondaı komıssııaǵa senimsizdik tanytyp otyrmyz», - dedi munaıshylardyń ókili.
Al otyn-energetıka kesheni salalyq kásipodaǵynyń tóraǵasy Quspan Qosshyǵulov «BerÁlı» kompanııasynyń jumysshylaryn bir kúnde jumyssyz qaldyrǵan buıryqtyń zańsyz rásimdelgenin aıtty.
«Qazirgi tańda Jańaózen jergilikti kásipodaǵy bizdiń salalyq kásipodaqtyń múshelik uıymy bolǵandyqtan, múddesin qorǵaýǵa atsalysyp júrmiz. Bul eńbek daýy – byltyr bolǵan máseleniń jalǵasy. Byltyr da osyndaı ereýil bolyp, 19 adamdy jumystan shyǵaryp jibergen. Sol jigitter byltyr da eńbek quqyqtaryn qorǵap Astanaǵa kelgen bolatyn. Sol kezde bul jigitterge usynys jasap, «BerAlı» mekemesine jumysqa ornalastyryp beredi. «BerAlıdi» ashyp beredi, uzyn sózdiń qysqasy. Mekemege basqa da jumysshylar alynady. 9 aıdan keıin «BerAlı» mekemesi ujymdy zańsyz buıryqpen jumystan shyǵaryp jiberedi. ıAǵnı, bulardyń eńbek shartynda «belgili bir merzimge deıin» dep qana jazylǵan. 31 naýryz kúni jigitterge 1 sáýirden bastap eńbek sharty toqtatylatynyn eskertedi de, 1 sáýirdegi kúnmen buıryq shyǵarylady. Bul demalys kúni bolatyn. Al demalys kúni mundaı buıryq shyǵarý zańsyz», - deıdi salalyq kásipodaq basshysy.
Onyń paıymdaýynsha, 12 sáýirden beri munaıshylarmen kelissóz júrgizgen komıssııanyń zańdy kúshi joq.
«12 sáýirde komıssııa jumysy bastaldy. Jolmurat Ulyqpannyń usynysymen 14 sáýirden bastap Jańaózen jergilikti kásipodaq tóraǵasynyń keńesshisi Maqsat Tasbaev ekeýmiz munaıshylarmen birge komıssııa aıasynda kelissóz júrgizip júrmiz. Bul jerde bizdiń kórgenimiz – birinshiden, komıssııanyń zańdy kúshi joq. Sebebi komıssııa qurý týraly ne Energetıka mınıstliginiń, bolmasa Eńbek jáne halyqty áleýmettik qorǵaý mınıstrliginiń, bolmasa «QazMunaıGaz» ulttyq kompanııasy» aktsıonerlik qoǵamynyń atynan eshqandaı da buıryq shyqpaǵan. Komıssııanyń zańsyzdyǵy osynda. Biz sony talap ettik. Birinshi komıssııany zańdastyryńyzdar, sodan keıin ǵana munaıshylardyń talabyn hattamaǵa engizip, konstrýktıvti jolmen shesheıik degen talap qoıdyq. Komıssııa otyrysyn «QazMunaıGazdyń» atynan shyǵarylǵan buıryq arqyly ǵana zańdastyrdy. 12 sáýirde jumysyn bastaǵan komıssııany qurý týraly buıryqty jigitter talap qoıǵannan keıin ǵana 19 sáýirde berdi. Biraq qazir komıssııa jumysy toqtap tur. Bizdiń estýimiz boıynsha, «QazMunaıgazdyń» 30 shaqty adamy Mańǵystaýǵa ketip qalǵan. Ózderiniń tekseristeri bolar endi. Soǵan baılanysty tek aýyzsha telefonmen eskertkeni, komıssııa otyrysy bul jerde bolmaıdy dep otyr. Qazirgi tańda biz osyǵan kelip tirelip otyrmyz», - dedi Quspan Qosshyǵulov.
Baspasóz konferentsııasy barysynda Mańǵystaý oblysy ákimdiginiń deńgeıinde komıssııa quryp, máseleni sonyń aıasynda sheshý usynylǵany aıtyldy.
Munaıshylardyń ókilderi ol komıssııanyń máseleniń sheshim tabatyndaı quzyreti bar ekenine kózderi jetse, óńirge baryp kelissóz júrgizýge daıyn ekenin jetkizdi.
Eske sala keteıik, 10 sáýirde Energetıka mınıstrligi ǵımaratynyń aldyna 70-ke jýyq jańaózendik munaıshy jınaldy.
Energetıka mınıstri Almasadam Sátqalıev Úkimet otyrysynan keıin BAQ ókilderine bergen suhbatynda vedomstvo ǵımaratynyń mańaıynda túnep shyqqan jańaózendik jumysshylardyń talaby boıynsha resmı sheshim ázirlenip jatqanyn aıtty.
Bul máselege pikir bildirgen vıtse-premer Altaı Kólginov zań aıasynda áreket etý qajettigin, «tenderden utylǵan kompanııanyń qaıtadan utyp shyqqanyn talap etý» durys emestigin aıtty.
11 sáýir keshkisin Energetıka mınıstrligi aldyna jınalǵan bir top jańaózendik munaıshylardy polıtsııa ustap áketti.
Keıin narazylyqqa shyqqan munaıshylardyń kóshbasshylary málimdeme jasap, eki jaq kelisimge kelgenin habarlady.
12 sáýirde munaıshylar Jańaózenge qaıtty.
Bir aptadan beri QazMunaıGaz ben munaıshylar ortaq kelisimge kelý úshin máseleni talqylap jatyr.
Keshe QMG basshysy Maǵzum Myrzaǵalıev ekijaqty kelissóz jaıynda pikir bildirdi.
Al QMG tóraǵasynyń orynbasary Dáýletjan Hasanov munaıshylar talaby kún saıyn ózgerip otyrǵandyqtan kelissóz júrgizý qıynǵa túsip otyrǵanyn jetkizdi.
