Jańaózen mańyndaǵy Qyzylsaı aýylynda dárigerlik ambýlatorııa ashyldy

AQTAÝ. QazAqparat - Jańaózen qalasyna qarasty Qyzylsaı aýylynda bir mezette 50-ge jýyq naýqasty qabyldaı alatyn dárigerlik ambýlatorııa ashyldy, dep habarlaıdy QazAqparat tilshisi.

Osylaısha 7 myńnan astam turǵyny bar aýyl halqyna el Táýelsizdiginiń 30 jyldyǵy qarsańynda tamasha tartý jasaldy.

Medıtsınalyq nysan zamanaýı medıtsınalyq quraldarmen jabdyqtalǵan.

Patsıentter ýltradybys, rentgen zertteýleri men zerthana jáne tis emdeý kabınetiniń qyzmetterin paıdalana alady.

40-tan astam kabınet jumys isteıdi. Ortalyqta 26 maman eńbek etedi. Jumysqa kelgen jas mamandarǵa áleýmettik qoldaý kórsetilgen.

Jańa ambýlatorııa ashylǵanǵa deıin jergilikti turǵyndar apatty jaǵdaıda turǵan ǵımaratqa kelip, dárigerlerge qaralatyn.

Jańa jobaǵa «Jumyspen qamtýdyń jol kartasy» aıasynda qarajat bólinip, 2020 jyldyń sońynda qurylys jumystary bastalǵan.

Búgingi tańda Qyzylsaı aýyldyq ambýlatorııasynda 5088 adam tirkelgen.

- Dárigerlik ambýlatorııa Jańaózen qalasyn áleýmettik-ekonomıkalyq damytýdyń 2019-2025 jyldarǵa arnalǵan keshendi jospary jáne «Nur Otan» partııasynyń 2025 jylǵa deıingi «Ózgerister joly: Ár azamatqa laıyqty ómir!» saılaýaldy baǵdarlamasy aıasynda aýyl turǵyndarynyń ómir súrý sapasyn arttyrý maqsatynda iske qosyldy. Aýyl halqynyń ósimi men bala týý kórsetkishin eskere otyryp, osy jobany júzege asyrdyq. Endi Qyzylsaı aýylynyń turǵyndary qalaǵa barmaı-aq, qajetti medıtsınalyq kómekti aýyldan ala alady, - deıdi Janaózen qalasynyń ákimi Maqsat Ibaǵarov.