Jańaózen mańynda bolǵan jol apatynda aıaǵynan aıyrylǵan búldirshin qyz esin jıdy
ASTANA. QazAqparat - Jańaózen mańynda bolǵan jol apaty saldarynan aıaǵynan aıyrylǵan búldirshin qyz esin jıdy, dep habarlaıdy «QazAqparat» HAA «Ladaǵa» silteme jasap.
10 jasar qyzdyń jaǵdaıy týraly oblystyq balalar aýrýhanasy dırektorynyń emdeý isi jónindegi orynbasary Álııa Áshimova aıtyp berdi. Onyń aıtýynsha, eki aıaǵyn kesip alyp tastaǵan qyz esin jıǵan. Ony travmatologııa bólimine aýystyrdy. Balamen psıholog mamandar jumys istep jatyr.
«Ázirge búldirshinniń sózi túsiniksiz. Dárigerlerdi kórgen kezde qorqyp, jylaıdy. Ata-anasyn tanyp jatyr. Ol ózdiginen tamaqtanýda. Biraq jaǵdaıy turaqty aýyr. Kúnde onymen jáne onyń ata-anasymen psıholog mamandar jumys istep jatyr», - dedi Álııa Áshimova.
Mańǵystaý oblystyq densaýlyq saqtaý basqarmasynda Aqtaý men Jańaózendegi aýrýhanalarda taǵy tórt adam jatqanyn habarlady.
«Mańǵystaý oblystyq aýrýhanasynda 19 jastaǵy jigit jatyr. Ony 6 jeltoqsanda Jańaózennen sanavıatsııamen alyp kelgen edi. Kún saıyn bizdiń dárigerler elordalyq travmatologtarmen baılanysyp, jumys istep jatyr. Ol Aqtaýda qajetti em alǵannan keıin, protezdeý úshin Astanaǵa jiberiledi», - dedi Mańǵystaý oblystyq densaýlyq saqtaý basqarmasynyń basshysy Talǵatbek Bapıev.
Eske sala ketsek , 25 qarashada «GAZel» men teplovoz soqtyǵysqan jan túrshigerlik jol apaty bolǵan edi. Oqıǵa saldarynan 9 adam qaza taýyp, 27 jolaýshy aýrýhanaǵa jetkizilgen.
