Jańaózen mańynda apattan zardap shekken 15 adam aýrýhanadan shyǵaryldy
AQTAÝ. QazAqparat - Jańaózen mańyndaǵy temirjol ótkelinde bolǵan jol apatynan zardap shekken 15 naýqas aýrýhanadan shyǵaryldy. Bul jaıly Jańaózen qalalyq aýrýhanasynyń emdeý jumystary jónindegi orynbasary Raýshan Japarova málim etti, dep habarlaıdy «QazAqparat» HAA tilshisi.
«Bizdiń aýrýhanamyzdyń bólimshelerinde taǵy toǵyz naýqas emdelip jatyr. Olardyń barlyǵynyń jaǵdaıy aýyr boldy. Eki adam áli jansaqtaý bóliminde. Olardyń jaǵdaıy turaqty, dárigerlerdiń kúshimen aýyr kúnderdiń bári artty qaldy», - dedi R.Japarova.
Ol sondaı-aq, hırýrgııa bólimshesinde taǵy úsh adamnyń, travmotologııa bólimshesinde tórt adam jatqanyn habarlady.
«Jańaózen aýrýhanasyna túsken 2003 jyly týǵan bala birneshe jerinen jaraqattanǵan, bas súıek-mıy zaqymdanǵan, mıy shaıqalǵan, ishinen jaraqat alǵan. Ol uzaq ýaqyt boıy jasandy tynys aldyrý apparaty arqyly tynys aldy, qazirgi ýaqytta ókpe jasandy jeldetý apparatynan bosatyldy. Búgingi tańda naýqastardyń jaǵdaıy aıtarlyqtaı jaqsardy dep aıtýǵa tolyq negiz bar», - dedi R.Japarova.
Aıta keteıik, 25 qarasha kúni Jańaózen qalasy mańyndaǵy Teńge aýylyna jaqyn jerdegi temirjol ótkelinde teplovoz jolaýshylar tasymaldaıtyn «GAZelge» soǵylǵan bolatyn. Jol apaty saldarynan 36 adam zardap shekti. 9-y qaza taýyp, 27-si aýrýhanaǵa jetkizildi.
Buǵan deıin habarlanǵandaı, oblys ákiminiń buıryǵymen qaza tapqan azamattardyń otbasylaryna 1 mln teńge, aýrýhananyń jansaqtaý bóliminde aýyr halde jatqan 9 naýqasqa 500 myń teńge bólý týraly tapsyrma berildi. Qalǵan 18 zardap shegýshige 300 myń teńgeden bólinedi.
